ლანჩხუთის მუნიციპალიტეტის სოფელ სუფსაში, თბილისი - ბათუმის ავტომაგისტრალზე მომხდარ ავტოსაგზაო შემთხვევას ერთი პირის სიცოცხლე ემსხვერპლა.
წინასწარი ინფორმაციით, სამარშრუტო ტაქსს, რომელიც სავარაუდოდ, ფოთიდან მიდიოდა ტრაილერის ტიპის ავტომანქანა დაეჯახა. შემთხვევის შედეგად სამარშრუტო ტაქსის მგზავრი ადგილზე დაიღუპა.
ადგილზე მობილიზებულია საპატრულო პოლიციის ეკიპაჟები, მიმდინარეობს საგამოძიებო მოქმედებები. გარდაცვლილის ცხედარი ექსპერტიზაზეა გადასვენებული.
როგორც ,,ინტერპრესნიუსს“ შსს-ში განუცხადეს, მომხდართან დაკავშირებით გამოძიება სისხლის სამართლის კოდექსის 276-ე მუხლის მე- 6 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია.