ბათუმში, აჭარის მთავრობის სახლთან ოპოზიციამ მორიგი საპროტესტო აქცია გამართა, რასაც სამართალდამცველებსა და აქციის მონაწილეებს შორის ხმაური და სიტყვიერი დაპირისპირება მოჰყვა. სამართალდამცველებმა აქციის რამდენიმე მონაწილე დააკავეს.

არეულობა მას შემდეგ დაიწყო, რაც აქციის რამდენიმე მონაწილე აჭარის მთავრობის სახლის შენობასთან მივიდა და აჭარის მთავრობის თავმჯდომარე, თორნიკე რიჟვაძესთან შეხვედრა მოითხოვა.

“დაკავებულების რაოდენობას ვაზუსტებთ. პოლიციელების კანონიერი მოთხოვნა იყო, რომ აქციის მონაწილეებს ტერიტორია დაეტოვებინათ, რასაც არ დაემორჩილნენ. გარკვეული პირები პოლიციას ხელს უშლიდნენ დაკავებაში, ასევე ავტომანქანას რომ ტერიტორია დაეტოვებინა. ამან გამოიწვია დაკავებულების გაყვანის შეფერხება. არანაირი გადაცდომა არ ყოფილა. მშვიდობიან პროცესს ხელს არავინ უშლის. მათ განუმარტა სახელმწიფო დაცვის სპეციალურმა სამსახურმა, რომ აღნიშნული შეხვედრა ვერ შედგებოდა, განუმარტეს, რომ დაეტოვებინათ ტერიტორია, აღნიშნულმა კი მათი უკმაყოფილება გამოიწვია“,-განუცხადა „ტვ პირველს“ აჭარის პოლიციის დეპარტამენტის უფროსმა, კონსტანტინე ანანიაშვილმა.

მან დაადასტურა ინფორმაცია, რომ არეულობის შედეგად ასევე ერთი სამართალდამცველი დაშავდა.