აშშ-ის პრეზიდენტმა დონალდ ტრამპმა კიდევ ერთხელ გაიმეორა, რომ 2021 წლის თავდაცვის ბიუჯეტის კანონპროექტს ვეტოს დაადებს, - ამის შესახებ ინფორმაციას Reuters-ი ავრცელებს.

„ჩვენი თავდაცვის კანონპროექტის ყველაზე დიდი გამარჯვებული ჩინეთია. მე ვეტოს დავადებ ამ კანონპროექტს,“- განაცხადა დონალდ ტრამპმა.

პრეზიდენტი ტრამპი აპროტესტებს 2021 წლის თავდაცვის ბიუჯეტს, რადგან მისი განცხადებით, ის არ აუქმებს კომუნიკაციების მართებულობის აქტის 230-ე ნაწილს, რომელიც ისეთ ტექნოლოგიურ კომპანიებს, როგორიცაა „გუგლი“, „ტვიტერი“ და „ფეისბუქი“, მათ პლატფორმებზე გამოჩენილი შინაარსის გამო პასუხისმგებლობისგან იცავს. ამასთანავე, ტრამპი ეწინააღმდეგება კანონმდებლობის ისეთ ნაწილებს, რომლებიც ავღანეთიდან და გერმანიიდან ჯარის გაყვანის გეგმებს შეანელებს.

დონალდ ტრამპს კანონპროექტი პარასკევს გადაუგზავნეს და მას ვეტოს დასადებად ან ხელმოსაწერად კვირის გამოკლებით 10 დღე აქვს. 2021 ფისკალური წლის ეროვნული თავდაცვის ავტორიზაციის აქტი, რომლის თანახმადაც აშშ-ის ბიუჯეტიდან თავდაცვის სფეროსთვის 740 მილიარდი აშშ დოლარია გათვალისწინებული, აშშ-ის კონგრესის ორივე პალატამ დაამტკიცა.