1 დეკემბრის მონაცემებით, მიმდინარე წელს მსოფლიოს სხვადასხვა ქვეყანაში მედია ინდუსტრიაში მოღვაწე 387 ადამიანი დააპატიმრეს, - ამის შესახებ ორგანიზაცია „რეპორტიორები საზღვრებს გარეშე“ ყოველწლიურ მოხსენებაშია აღნიშნული. მათივე ინფორმაციით, დაპატიმრების შემთხვევების ნახევარზე მეტი შემდეგ ხუთ ქვეყანაზე მოდის : ჩინეთი (117 ჟურნალისტი), საუდის არაბეთი (34), ეგვიპტე (30), ვიეტნამი (28) და სირია (27).
"რეპორტიორები საზღვრებს გარეშე" განსაკუთრებულ ყურადღებას ბელარუსს უთმობს, სადაც 9 აგვისტოს საპრეზიდენტო არჩევნების შემდეგ მინიმუმ 370 ჟურნალისტი დააკავეს, თუმცა მათი უმეტესობა მალევე გაათავისუფლეს.
„მიუხედავად ამისა, ჟურნალისტების დარბევა პრესის თავისუფლების დონის შემცირებას წარმოადგენს,“- აცხადებენ ორგანიზაციაში.
ამასთან, პანდემიის დაწყების დროიდან, კორონავირუსის კრიზისის შესახებ ინფორმაციის გავრცელებისთვის მსოფლიოს სხვადასხვა ქვეყანაში პრესის 130-ზე მეტი წარმომადგენელი დააკავეს, აქედან, ორგანიზაციის ინფორმაციით, ანგარიშის გამოქვეყნების დროისთვის მედიის 14 წარმომადგენელი კვლავ პატიმრობაში იმყოფებოდა.