რეგიონული პოლიტიკისა და თვითმმართველობის კომიტეტის პირველი მოადგილე გიორგი ხოჯევანიშვილი გახდა, ფრაქცია „ქართული ოცნების“ კვოტით მოადგილე კი - ეკა სეფაშვილი
პარლამენტის რეგიონული პოლიტიკისა და თვითმმართველობის კომიტეტის ხელმძღვანელმა სოზარ სუბარმა პირველი მოადგილის პოსტზე დეპუტატი გიორგი ხოჯევანიშვილი წარადგინა, რომელიც პარლამენტში მოსვლამდე, შიდა ქართლის გუბერნატორი იყო.
კომიტეტის თავმჯდომარის მოადგილის თანამდებობა კი, ფრაქცია “ქართული ოცნების“ კვოტით, ეკა სეფაშვილმა დაიკავა.
როგორც კომიტეტის პირველ საორგანიზაციო სხდომაზე სოზარ სუბარმა განაცხადა, კომიტეტის პრიორიტეტი თვითმმართველობის განმტკიცება და რეალური თვითმმართველობის ჩამოყალიბება იქნება.
სხვა კომიტეტების მსგავსად, რეგიონული პოლიტიკისა და თვითმმართველობის კომიტეტშიც ვაკანტურად რჩება თავმჯდომარის ერთი მოადგილის თანამდებობა, სადაც კანდიდატურა ოპოზიციამ უნდა წარადგინოს.
