პარლამენტის საპროცედურო საკითხთა კომიტეტის თავმჯდომარის, ირაკლი ქადაგიშვილის განცხადებით, პარლამენტის რიგგარეშე სესიაზე მინისტრთა კაბინეტს დაამტკიცებენ და 2021 წლის სახელმწიფო ბიუჯეტს მიიღებენ.
როგორც ქადაგიშვილმა განაცხადა, აღნიშნული საკითხები ბიუროს წევრებმა პარლამენტის თავმჯდომარესთან, არჩილ თალაკვაძესთან შეხვედრაზე განიხილეს.
„პარლამენტის თავმჯდომარესთან იყო თათბირი, ბიუროს წევრები შევიკრიბეთ. ახლა ხდება მიმდინარე სესიის დახურვა, ამავდროულად იქნება რიგგარეშე სესია, სადაც რამდენიმე მნიშვნელოვანი საკითხის განხილვა იქნება. ერთ-ერთი, პირველ რიგში, არის მინისტრთა კაბინეტის დამტკიცება და ახალი ბიუჯეტის მიღება. ამასთან ერთად, არჩეული დეპუტატების ნაწილმა შემოიტანა განცხადებები, რომელთა დაკავშირებითაც საპროცედურო კომიტეტში რეგლამენტის შესაბამისი ვადების დაცვით და შესაბამისი წესით მოხდება ამ განცხადებების განხილვა. მომავალი კვირიდან იქნება საკომიტეტო მოსმენები მთავრობასთან დაკავშირებით. პრემიერ-მინისტრის მხრიდან წარდგენა მოხდება სწორედ მომავალ კვირას, როდესაც პარლამენტში მობრძანდება პრემიერი და მის მიერ ინიცირებული მინისტრთა კაბინეტი, პერსონალური შემადგენლობაც მის მიერ იქნება გაცხადებული“, - განაცხადა ქადაგიშვილმა.