საჭირო იქნება თქვენთვის ჩვეული მკაცრი გადამწყვეტი პოზიციის დაფიქსირება, თქვენი ჩართულობა მცხეთის პრობლემის მოგვარებაში, - ამის შესახებ ჯანდაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ პლენარულ სხდომაზე განაცხადა, სადაც მინისტრობის კანდიდატებს უსმენენ.

მისი თქმით, მიუხედავად უამრავი მცდელობისა, ეს პრობლემა ისევ დღის წესრიგში დგას.

„ჩემი საუბრის თემა ეხება ისევ და ისევ ძველ პრობლემას, რომელიც გარკვეულ უხერხულობას მიქმნის - მცხეთის მორატორიუმს, რომელიც მძიმე მდგომარეობაში აყენებს ქალაქს და იქ მცხოვრებ ადამიანებს. ქალაქი 2015 წლის შემდეგ არის „დაბოქლომებული“. მთავრობის დღევანდელი არცერთი წარმომადგენელი არ იყო მაშინ ხელისუფლებაში. იმ პერიოდში ეს საკითხი იმდენად გაფუჭდა, რომ დღემდე მისი მოგვარება, მიუხედავად ძალიან დიდი მცდელობისა, ჭირს, მაგრამ ეს საკითხი აუცილებლად უნდა მოგვარდეს.

ყველა ვცდილობთ ამას, მაგრამ მცდელობას ექნება ფასი მაშინ, როცა ეს საკითხი იქნება ამოწურული და მოგვარებული. ქალაქი ვერ ვითარდება, მცხოვრებლების საკუთრების უფლება დარღვეულია, ქონება გაუფასურებულია პერსპექტივის არქონის გამო, საბანკო ურთიერთობებში მოქალაქეები ვერ შედიან (ეს კიდევ უფრო მძიმდება პანდემიის ფონზე), სოციალური პრობლემები ყოველდღიურად უფასურდება. მინდა გთხოვოთ, რომ ეს პრობლემა გავითავისოთ. ალბათ, საჭირო იქნება თქვენთვის ჩვეული მკაცრი გადამწყვეტი პოზიციის დაფიქსირება, თქვენი ჩართულობა და არა მხოლოდ თქვენი, ჩვენც, რა თქმა უნდა, მზად ვართ ამისთვის“, - მიმართა დიმიტრი ხუნდაძემ პრემიერ-მინისტრობის კანდიდატს, გიორგი გახარიას.