საქართველოს პრემიერ-მინისტრის გიორგი გახარიას განცხადებით, მმართველი გუნდი საქართველოს სტრატეგიულ პარტნიორების კრიტიკას ჯანსაღად აღიქვამს და ყოველთვის უსმენს. ამის შესახებ გახარიამ ჟურნალისტებთან განაცხადა.
მისივე თქმით, საკანონმდებლო ცვლილებებზე, გარკვეული სახის შეკითხვები არსებობდა, ამიტომ მმართველმა გუნდმა ის ვენეციის კომისიაში გადააგზავნა.
"ჩვენ ჩვენი მეგობრებისგან კრიტიკას ყოველთვის ჯანსაღად აღვიქვამთ და ვუსმენთ. რაშია სხვაობა?! როდესაც საუბარია იმაზე, რომ არჩევნებში ხარვეზები იყო, ჩვენს სტრატეგიულ პარტნიორებს მოვუსმინეთ და ისეთი რადიკალური ნაბიჯები მივიღეთ საარჩევნო რეფორმის გასატარებლად, რომ ამერიკის ელჩმა კელი დეგნანმა აღიარა, რომ რეფორმების ის ნუსხა, რომელიც ოპოზიციასთან შევათანხმეთ, არის: საჭირო, აუცილებელი და რადიკალურად განავითარებს საარჩევნო სისტემას. მეორე - იმ საკანონმდებლო ცვლილებებზე, რასაც თქვენ ამბობთ და მკაცრად აფასებთ, როგორც კი ჩვენს სტრატეგიულ პარტნიორებთან დავსხედით და ვნახეთ, რომ შეკითხვები იყო, ავდექით და ვენეციის კომისიაში გავაგზავნეთ. კიდევ რა გავაკეთოთ?! და კიდევ, ჩვენი მეგობრები, ჩვენი სტრატეგიული პარტნიორები, რასაც მოგვიწოდებენ იმას ვაკეთებთ", - განაცხადა გახარიამ.