შინაგან საქმეთა სამინისტროს საზოგადოებრივი უსაფრთხოების მართვის ცენტრი "112”- ის დირექტორი გიორგი არსოშვილი აცხადებს, რომ 112-ში არამიზნობრივი ზარები არ შემცირებულა და მოქალაქეებს მოუწოდებს, ზარი მხოლოდ საჭიროების შემთხვევაში განახორციელონ.

„პანდემიური ფონისა და მაღალი მომართვიანობის მიუხედავად, 112-ში არამიზნობრივი ზარების რაოდენობა არ შემცირებულა და ყოველდღიურად სამწუხაროდ, არამიზნობრივად მომართვიანობა 112-ში არის 30%. კიდევ ერთხელ მინდა მოვუწოდო მოქალაქეებს, რომ 112 მხოლოდ იმ შემთხვევაში გამოვიყენოთ, როდესაც გვესაჭიროება კონკრეტული დახმარება“,-განაცხადა გიორგი არსოშვილმა მთავრობის ადმინისტრაციაში გამართულ ბრიფინგზე.

მისივე თქმით, არაერთი ღონისძიება გატარდა 112-ში გაზრდილი მიმართვიანობის გამო დაყოვნებების აღმოსაფხვრელად.

„ისევე როგორც შსს-ს ყველა სხვა დანაყოფი, 112-იც რა თქმა უნდა, პანდემიის ფარგლებში მაქსიმალურადაა მობილიზებული, რათა ყველა მოქალაქემ შესაბამისი დახმარება მიიღოს. 112-მა პანდემიის ფარგლებში განსაკუთრებული დატვირთვა შეიძინა. აქედან გამომდინარე გაიზარდა მომართვიანობა წინა წელთან შედარებით. მომართვიანობა პანდემიის ფარგლებში დაახლოებით 80%-ითაა გაზრდილი, რამაც თავისთავად გამოიწვია გარკვეული დაყოვნება, რისთვისაც თითოეულ მოქალაქეს მინდა კიდევ ერთხელ ბოდიში მოვუხადო. მინდა აღვნიშნო, რომ ჩვენ ყველა ღონისძიება გავატარეთ, რათა ეს მოლოდინები აღმოფხვრილიყო. მინდა გითხრათ, რომ ბოლო ტენდენცია 112-ში საკმაოდ დადებითია, დაახლოებით 38%-ითაა შემცირებული მომართვიანობა როგორც სასწრაფო სამედიცინო ხასიათის გამოძახებებზე, ასევე კოვიდ კონსულტაციებზე, ასევე შემცირდა საშუალო დღიური მომართვიანობა დაახლოებით 31%-ით. ყველაზე დაბალი მომართვიანობა ბოლო 6 თვის განმავლობაში 20 დეკემბერს დაფიქსირდა, დაახლოებით 10 000 ზარი იყო მხოლოდ. გვეიმედება, რომ ეს ტენდენცია შენარჩუნდება“,-აღნიშნა 112-ის დირექტორმა.