ესპანეთში უამინდობას მინიმუმ ორი ადამიანის სიცოცხლე ემსხვერპლა. „როიტერის“ინფორმაციით, მალაგაში ქალი დაიღუპა, როცა ადიდებულმა მდინარემ მისი ავტომობილი გაიტაცა. მეორე მსხვერპლი უსახლკარო პირია, რომელიც კალატაიუდში ყინვისგან გარდაიცვალა.

შეგახსენებთ, ესპანეთში დიდთოვლობამ პრობლემები შექმნა. თოვლმა და ყინულმა შეფერხება გამოიწვია 400-მდე ავტომაგისტრალზე, რის შედეგადაც 1000-მდე ადამიანი გზებზე ჩარჩა. დროებით დაიხურა მადრიდის აეროპორტიც. მადრიდის ცენტრში ქარის მიერ წაქცეულმა ხეებმა ავტომობილები დააზიანა. ხელისუფლებამ სიფრთხილის ზომების გათვალისწინებით, დედაქალაქში დიდი პარკები დახურა. შეჩერდა ჩქაროსნული სარკინიგზო მიმოსვლა მადრიდსა და ქალაქ ალიკანტეს და ვალენსიას შორის. ხელისუფლებამ მოსახლეობას მოუწოდა, არააუცილებელი მგზავრობისგან თავი შეიკავოს. თავდაცვის სამინისტროს განცხადებით, გზების გაწმენდისა და სამაშველო ღონისძიებებში მთელი ქვეყნის მასშტაბით სამხედრო მოსამსახურეები მონაწილეობენ. მეტეოროლოგები მადრიდში მომდევნო დღეებში ცივ ამინდებს და ტემპერატურის მინუს 12 გრადუსამდე დაცემასაც პროგნოზირებენ.