პარლამენტის ვიცე-სპიკერის კახა კუჭავას განცხადებით, „ოპოზიცია დიდი ხანია ერთიანობის ჩვენებას ცდილობს, თუმცა ძალიან კარგად ჩანს, რომ ეს არის მოჩვენებითი ერთიანობა". ასე გამოეხმაურა კუჭავა მამუკა ხაზარაძეს და ალეკო ელისაშვილს მომხდარ დაპირისპირებას.
„რეალურად ჩვენ გვესმის მათთვის მნიშვნელოვანი გზავნილები იმის შესახებ, რომ კუთვნილი მანდატები მიიღონ და ქუჩის მაგივრად, პარლამენტში გასწიონ ოპონირება. ამას ზოგო ოპოზიციონერი ეთანხმება, ზოგი - არა, რაც დაძაბულობის მიზეზს წარმოადგენს. რეალურად საზოგადოება ძალიან კარგად ხედავს, რომ ოპოზიცია ერთიანი არ არის“, - განაცხადა კუჭავამ.
შეგახსენებთ, რომ მამუკა ხაზარაძე გუშინ ალეკო ელისაშვილს „რუსთავი 2“-ის ეთერში სიტყვიერად დაუპირისპირდა და მას მატყუარა და ავანტიურისტი უწოდა. ხაზარაძემ ელისაშვილს მოუწოდა, ოპოზიციის გვერდით არ გაიაროს და განაცხადა, რომ მისნაირ ადამიანს ხელს არ ჩამოართმევს.