„ქართული ოცნების" დეპუტატის მიხეილ სარჯველაძის შეფასებით, ოპოზიციის რიგებში დიდია მონდომება, რომ განსხვავებული აზრი იდევნებოდეს და ყველას პოზიცია ერთ თარგზე იყოს მოჭრილი.
მისივე თქმით, ასეთი მიდგომა პრინციპულად არასწორია და თავისუფალი აზრის გამოხატვას ეწინააღმდეგება.
„მოსალოდნელი იყო, რომ ოპოზიციაში განსხვავებული მოსაზრებები იქნებოდა. არა მგონია, თავისუფალი და განსხვავებული აზრი დამალვადი იყოს. ამიტომ არის მცდელობა, შეაშინონ, დაამუნათონ და წინაღობები შეუქმნან ნებისმიერ განსხვავებულად მოაზროვნეს, ვინც იმ რიტორიკის ფარგლებში არ ჯდება, რასაც ოპოზიციის ნაწილი მიმართავს. ეს არ არის ქვეყნის ინტერესებისა და კონსტრუქციული დიალოგისკენ მომართული. უნდა მივეჩვიოთ განსხვავებული აზრის პატივისცემას", - განუცხადა ჟურნალისტებს მიხეილ სარჯველაძემ.
შეგახსენებთ, რომ მამუკა ხაზარაძე გუშინ ალეკო ელისაშვილს „რუსთავი 2“-ის ეთერში სიტყვიერად დაუპირისპირდა და მას მატყუარა და ავანტიურისტი უწოდა. ხაზარაძემ ელისაშვილს მოუწოდა, ოპოზიციის გვერდით არ გაიაროს და განაცხადა, რომ მისნაირ ადამიანს ხელს არ ჩამოართმევს.