ეს არის უზარმაზარი ნაბიჯი საქართველოს დეოკუპაციის გზაზე,- ამის შესახებ საპარლამენტო უმრავლესობის წევრმა სოზარ სუბარმა სტრასბურგის სასამართლოს გადაწყვეტილებასთან დაკავშირებით ჟურნალისტებთან განაცხადა.
როგორც მან აღნიშნა, მთელი რიგი მტკიცებულებები გამქრალი იყო წინა ხელისუფლების დროს.
"სტრასბურგის გადაწყვეტილება მართლა ისტორიული გადაწყვეტილებაა. საქართველომ ყველა პუნქტში მოიგო. ეს არის უზარმაზარი ნაბიჯი საქართველოს დეოკუპაციის გზაზე. ამაზე დიდი ნაბიჯი ამ წლების განმავლობაში არ გადადგმულა. მთელი რიგი მტკიცებულებები იყო დაკარგული და გამქრალი, გამქრალი სწორედ წინა ხელისუფლების ძალისხმევით და თეა წულუკიანმა და მისმა გუნდმა უზარმაზარი შრომა გასწიეს იმისთვის, რომ ეს მტკიცებულებები საქართველოში დაბრუნებულიყო. ყველა ადამიანი ვინც გარკვეული ინფორმაციის მომცემი იყო, მათი დაკითხვა და მათგან ინფორმაციის შეგროვება მომხდარიყო, ყველა შეგროვებული მტკიცებულება წასულიყო სტრასბურგში და იქაც მაღალ იურიდიულ დონეზე მომხდარიყო საქართველოს ინტერესების დაცვა. ამის შედეგი იყო ის, რომ საქართველომ გაიმარჯვა ყველა პუნქტში, არა მხოლოდ ცხინვალის მიმართულებით, არამედ იგივე მოხდა აფხაზეთთან დაკავშირებითაც. მთავარი გამარჯვება აქ ისაა, რომ ეს საქართველოს ტერიტორიული მთლიანობის აღდგენას და დეოკუპაციას აახლოვებს", - განაცხადა სუბარმა.