პროკურორი - ჩანაწერში ბრალდებული ფაქტობრივად ამბობს, რომ ჩიჩხიტურის მიმდებარედ მოხდა საზღვრის ხაზის გავლება, აზერბაიჯანული მხარის პოზიციის შესაბამისად

ნატალია ილიჩოვამ და ივერი მელაშვილმა ზემდგომების დავალების შესაბამისად, ყოველგვარი დასაბუთების გარეშე, იმის მიუხედავად, როგორც ერთ-ერთი ბრალდებული ამბობს, რომ მას ამის გაკეთება არ სურდა, საზღვრის ხაზი საქართველოს ინტერესების საზიანოდ გაავლეს და ასე შეათანხმეს ის კომისიების მუშაობის ფორმატში, - ამის შესახებ პროკურორმა ამირან გულუაშვილმა „პალიტრა ნიუსის“ გადაცემაში „360 გრადუსი“ განაცხადა, რითაც დავით გარეჯის საქმესთან დაკავშირებით ისაუბრა.

როგორც პროკურორმა განმარტა, პროკურატურის მიერ გავრცელებულ აუიდიო-ვიდეო ჩანაწერში ნათლად ჩანს, როდესაც ბრალდებული აფიქსირებს საკუთარ პოზიციას და ფაქტობრივად ამბობს, რომ ყოველგვარი დასაბუთების გარეშე ჩიჩხიტურის მიმდებარედ მოხდა საზღვრის ხაზის გავლება აზერბაიჯანული მხარის პოზიციის შესაბამისად.

ამირან გულუაშვილის თქმით, საქართველოს მხარეს თავდაპირველად გააჩნდა განსხვავებული პოზიცია, თუმცა მოხდა ამ პოზიციის შეცვლა და საბოლოო ჯამში, საქართველოს გარკვეული ტერიტორია საზღვრის გავლებული ხაზის შესაბამისად, გადავიდა აზერბაიჯანის სახელმწიფოს ტერიტორიაზე.

„ბრალდებული პირდაპირ ამბობს, რომ მას ამის გაკეთება არ უნდოდა, თუმცა საბოლოო ჯამში, შედეგად მივიღეთ ის, რომ საქართველოს ტერიტორიის დაახლოებით 3 500 ჰექტარი, რომელიც ისტორიულად და კარტოგრაფიული მასალაზე დაყრდნობით წარმოადგენს საქართველოს ტერიტორიას, დღეს, შეთანხმებული საზღვრის მონაკვეთების თანახმად არის აზერბაიჯანის ტერიტორია. სსკ-ის 308-ე მუხლი არ გულისხმობს გადაცემას, როგორც დასრულებულ პროცესს, იმისათვის, რომ მოხდეს ქმედების დანაშაულად კვალიფიკაცია. საქართველოს ტერიტორიული მთლიანობისთვის საფრთხის შექმნაც კი, ისჯება სისხლის სამართლის წესით და თავისუფლების აღკვეთა საკმაოდ ხანგრძლივი ვადით არის გათვალისწინებული. საქართველოს ტერიტორიული მთლიანობა ეს არის ძალიან მნიშვნელოვანი საკითხი ქვეყნისათვის და სწორედ ამიტომ, კანონი უმკაცრესად უდგება საკითხებს, თუნდაც საფრთხის

შექმნის დონეზეც კი. შესაბამისად, ბრალდებულების, ივერი მელაშვილის და ნატალია ილიჩოვას ქმედებებმა, რაც გამოიხატა ისტორიულ სინამდვილესთან სრულიად აცდენილი საზღვრის ხაზის გავლებაში, საფრთხე შეუქმნა საქართველოსგან გარკვეული ტერიტორიების გასვლას და უცხო სახელმწიფოსთვის მათ გადაცემას. ამაში გამოიხატა მათი დანაშაულებრივი ქმედებები. მათ უგულებელყვეს რელევანტური კარტოგრაფიული მასალა. არსებობდა სულ მცირე, 5 რუკა, რომელიც ადასტურებდა იმას, რომ ეს ტერიტორიები საქართველოს ტერიტორიები იყო. ამის მიუხედავად არცერთი მათგანი მათ არ გამოიყენეს. უფრო მეტიც, ფაქტობრივად, მათ ზემდგომების დავალების შესაბამისად, ყოველგვარი დასაბუთების გარეშე იმის მიუხედავად, როგორც ერთ-ერთი ბრალდებული ამბობს, რომ მას ამის გაკეთება არ სურდა, საზღვრის ხაზი გაავლეს საქართველოს ინტერესების საზიანოდ და ასე შეათანხმეს ის კომისიების მუშაობის ფორმატში“. - განაცხადა ამირან გულუაშვილმა.

ცნობისთვის, საქართველოს გენერალურმა პროკურატურამ სახელმწიფო უსაფრთხოების სამსახურთან ერთობლივი თანამშრომლობით დააკავა საქართველოს საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსი - ივერი მელაშვილი და საქართველოს შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა. პროკურატურის ინფორმაციით, ექსპერტიზის დასკვნით დადგინდა, რომ ბრალდებულები საზღვრების დელიმიტაციის პროცესში ხელმძღვანელობდნენ 1970-80-იან წლებში გამოცემულ რუკებზე დატანილი საზღვრის ხაზებით, რაც არსებითად ეწინააღმდეგება ჩვენი ქვეყნის ისტორიულ საზღვარს, მათ შორის დავით გარეჯთან მიმართებაში.

დღეს გამართულ ბრიფინგზე ცნობილი გახდა, რომ გენერალურმა პროკურატურამ ივერი მელაშვილისა და ნატალია ილიჩოვას ბრალდების საქმეზე გამოძიება დაასრულა. საქმე ამიერიდან თბილისის საქალაქო სასამართლოში წარიმართება.

რა კრიტერიუმებს უნდა აკმაყოფილებდეს გერმანიაში სეზონურ სამუშაოზე წასვლის მსურველი და რა იქნება საქართველოს მოქალაქეების ანაზღაურება?
ქართული პრესის მიმოხილვა 08.03.2021
ალექსანდრე თვალჭრელიძე - ქართულმა პოლიტიკურმა სისტემამ მდგრადობა დაკარგა და გარე ჩარევის გარეშე მისი გამოსწორება შეუძლებელია
სილქნეტი განცხადებას ავრცელებს (R)