დავით გარეჯის საქმეზე საქართველოს გენერალურ პროკურატურაში საგარეო საქმეთა მინისტრის ყოფილი მოადგილე გიორგი მანჯგალაძე გამოკითხვაზე ისევ დაიბარეს. უწყების კითხვებს ის ამ წუთებში პასუხობს.
მანჯგალაძე საგამოძიებო უწყებაში ჩვენების მისაცემად 13 იანვარსაც იმყოფებოდა. როგორც ის აცხადებდა, გამოძიების ყველა კითხვას გასცა პასუხი, თუ რა კითხვები დარჩა პროკურატურას მინისტრის ყოფილ მოადგილესთან, ან უკავშირდება თუ არა ეს გამოკითხვა ნატალია ილიჩოვასა და ივერი მელაშვილისთვის დაზუსტებულ ბრალს, რომელშიც „ზემდგომი პირების დავალების შესაბამისი მოქმედება“ გაჩნდა, ეს უცნობია.
ცნობისთვის, საქართველოს გენერალურმა პროკურატურამ სახელმწიფო უსაფრთხოების სამსახურთან ერთობლივი თანამშრომლობით დააკავა საქართველოს საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსი - ივერი მელაშვილი და საქართველოს შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.
პროკურატურის ინფორმაციით, ექსპერტიზის დასკვნით დადგინდა, რომ ბრალდებულები საზღვრების დელიმიტაციის პროცესში ხელმძღვანელობდნენ 1970-80-იან წლებში გამოცემულ რუკებზე დატანილი საზღვრის ხაზებით, რაც არსებითად ეწინააღმდეგება ჩვენი ქვეყნის ისტორიულ საზღვარს, მათ შორის დავით გარეჯთან მიმართებაში.
ამასთან, რამდენიმე დღის წინ, ნატალია ილიჩოვასა და ივერი მელაშვილს რამდენიმე დღის წინ ბრალი დაუზუსტდათ. პროკურატურის ინფორმაციით, ბრალდებულები განზრახ, ზემდგომი პირების დავალებების შესაბამისად მოქმედებდნენ.