საზოგადოების მოთხოვნაა, რომ არ მოხდეს გაყალბებული არჩევნების დაკანონება, - ამის შესახებ „ევროპული საქართველოს“ წევრმა ლევან თარხნიშვილმა ჟურნალისტებს განუცხადა.
მან პარლამენტის თავმჯდომარეს, არჩილ თალაკვაძეს მიმართა, „საკუთარ საქმეს მიხედოს და ოპოზიციის განცხადებები განიხილოს“.
„მოდით, ბატონმა თალაკვაძემ თავის საქმეს მიხედოს და გააკეთოს ის, რაც მას ევალება, განიხილოს ეს განცხადებები. ოპოზიციისა და საზოგადოების დიალოგს როგორმე ჩვენ თვითონ დავალაგებთ. სწორედ საზოგადოების მოთხოვნაა ის, რომ არ მოხდეს გაყალბებული არჩევნების დაკანონება. გარდა ამისა, სწორედ საზოგადოების შეურაცხყოფაა ის, რასაც აკეთებს „ქართული ოცნება“ 8 წლის განმავლობაში. ის, რაც გააკეთა ოქტომბრის არჩევნების დროს, როდესაც ხალხს წაართვეს არჩევანი და საშუალება, რომ არჩევნების გზით შეეცვალათ ხელისუფლება. აი, ეს არის ადამიანების და საზოგადოების შეურაცხყოფა. ის, რომ ამდენი ხნის განმავლობაში საზოგადოება ჰყავთ ჩაკეტილი უაზრო რეგულაციებით, თვითონ კი ყველაფერი მშვენივრად შეირგეს“, - განაცხადა თარხნიშვილმა.
როგორც მან აღნიშნა, ოპოზიციამ „ქართული ოცნების“ მიერ წარმოდგენილ წინადადებაზე უარი დიდი ხის წინ განაცხადა.
„სწორედ „ქართული ოცნებიდან“ უნდა წამოსულიყო ახალი წინადადება. ის ე.წ. მემორანდუმი, რომელიც ე.წ. ოპოზიციასთან გააფორმეს, ეს არის დოკუმენტი, რომელიც მათ მოიტანეს მოლაპარაკებების დროს, იმის გაუარესებული ვარიანტი. ამ დოკუმენტზე უკვე დიდი ხნის წინ ითქვა უარი სრულიად ოპოზიციის მხრიდან. შესაბამისად, გაუგებარია, ახლა რატომ უნდა დავთანხმდეთ“,- განაცხადა თარხნიშვილმა.
იხილეთ ვიდეო:არჩილ თალაკვაძემ თავის საქმეს მიხედოს, განცხადებები განიხილოს, ოპოზიციისა და საზოგადოების დიალოგს კი როგორმე თავად დავალაგებთ - ლევან თარხნიშვილი