საქართველოს პარლამენტის წევრის თამარ ტალიაშვილის განცხადებით, თუ დარჩენილი ოპოზიციის არჩევანი საქართველოს ევროინტეგრაციაა, ისინი დასავლელი პარტნიორების მოწოდებას გაიზიარებენ, ხოლო წინააღმდეგ შემთხვევაში, რადიკალი რეაქციონერი ლიდერების მძევლებად დარჩებიან. ამის შესახებ ტალიაშვილმა ევროპის ინტეგრაციის კომიტეტის სხდომაზე განაცხადა.
მისივე თქმით, საქართველოს ევროპასთან ინტეგრაციის დღის წესრიგი და ანგარიში ის თემაა, რომლითაც საქართველოს პარლამენტში წარმოდგენილი პოლიტიკური სპექტრი დაინტერესებული უნდა იყოს და კომიტეტის სხდომასაც უნდა ესწრებოდეს.
“მიმაჩნია, რომ საქართველოს ევროპასთან ინტეგრაციის დღის წესრიგი და ანგარიში არის ის თემა, რომლითაც უნდა ინტერესდებოდეს და ესწრებოდეს საქართველოს პარლამენტში წარმოდგენილი პოლიტიკური სპექტრი სრულიად. ამის საშუალებას იძლევა 2020 წლის არჩევნების შედეგები და ჩვენ ვიცით, რომ იგივე ევროკავშირის ელჩი საქართველოში თუ ჩვენი სხვა დასავლელი პარტნიორები ძალიან აქტიურად მოუწოდებენ დარჩენილ ოპოზიციას, რომ შემოვიდნენ პარლამენტში და გამოიყენონ მანდატი ისეთ მნიშვნელოვან საკითხებზე სამუშაოდ როგორიცაა, მაგალითად, ეს კონკრეტული თემა და მიმაჩნია, რომ თუ დარჩენილი ოპოზიცია არ გაიზიარებს ევროპელი პარტნიორების შეხედულებებს და მოწოდებებს, ისინი უბრალოდ დარჩებიან მძევლებად რეაქციონერი და რადიკალური ლიდერებისა“ , - განაცხადა თამარ ტალიაშვილმა.
ცნობისთვის, თამარ ტალიაშვილი წინა კვირას სტრასბურგში იმყოფებოდა, სადაც საქართველოს საპარლამენტო დელეგაციასთან ერთად, ასამბლეის ზამთრის სესიის მუშაობაში იღებდა მონაწილეობას.