თბილისის მერი კახა კალაძე მომღერალ თემურ წიკლაურის გარდაცვალების გამო მწუხარებას გამოთქვამს.
როგორც კალაძე „ფეისბუქზე“ წერს, თემურ წიკლაური იყო კაცი, რომელმაც უკვდავი სასცენო სახეები შექმნა და თავისი შემოქმედება ყველა თაობის ადამიანს დაამახსოვრა.
„ჩვენ გვერდით აღარ არის ყველასთვის საყვარელი მომღერალი, საქართველოს სახალხო არტისტი, საპატიო თბილისელი თემურ წიკლაური. კაცი, რომელმაც უკვდავი სასცენო სახეები შექმნა და თავისი შემოქმედება ყველა თაობის ადამიანს დაამახსოვრა. ვწუხვარ და ვიზიარებ მისი ოჯახისა და მეგობრების დიდ დანაკარგს“, - წერს კალაძე სოციალურ ქსელში.
ცნობილი ქართველი მომღერალი და მსახიობი თემურ წიკლაური დღეს გარდაიცვალა. თემურ წიკლაური კორონავირუსის დიაგნოზით გორის სამხედრო ჰოსპიტალში დეკემბერში მოათავსეს. მდგომარეობის გართულების შემდგომ ის თითქმის ხუთი კვირის განმავლობაში მართვით სუნთქვაზე იმყოფებოდა. თემურ წიკლაური 75 წლის იყო.