რადიკალური ოპოზიცია პროცედურული ინსტრუმენტების გამოყენებით ცდილობს განახორციელოს ის, რასაც ჩვენ ვუწოდებდით პარლამენტის საბოტაჟს, - ამის შესახებ პარტია „ქართული ოცნება- დემოკრატიული საქართველოს“ თავმჯდომარემ ირაკლი კობახიძემ ბრიფინგზე განაცხადა, სადაც მმართველი გუნდის გადაწყვეტილება გაახმოვანა იმის თაობაზე, რომ ამ ეტაპზე ოპოზიციონერი დეპუტატებისთვის უფლებამოსილების შეწყვეტისგან თავს შეიკავებენ.
მისი თქმით, საქართველოს კონსტიტუცია იმდენად გამართულია, რომ შეუძლია ამ საბოტაჟის მცდელობას უფრო ეფექტური პროცედურული ინსტრუმენტები დაუპირისპიროს და ოპოზიციონერ დეპუტატებს მანდატები არ შეუწყვიტოს.
„რადიკალური ოპოზიცია პროცედურული ინსტრუმენტების გამოყენებით, ცდილობს, განახორციელოს ის, რასაც ჩვენ ვუწოდებდით პარლამენტის საბოტაჟს და რაც გასულ ორშაბათს ევროპის საბჭოს საპარლამენტო ასამბლეამ კიდევ უფრო მწვავედ შეაფასა, როგორც დემოკრატიისთვის ძირის გამოთხრის მცდელობა. თუმცა, საქართველოს აქვს გამართული კონსტიტუცია, რომელიც დემოკრატიის წინააღმდეგ მიმართულ პროცედურულ ინსტრუმენტებს კიდევ უფრო ქმედით პროცედურულ ინსტრუმენტებს უპირისპირებს. სწორედ ამგვარი კონსტიტუციური ინსტრუმენტია პარლამენტის შესაძლებლობა, დაუპირისპირდეს პარლამენტის საბოტაჟს და საბოტაჟის განმახორციელებელ დეპუტატებს არ შეუწყვიტოს საპარლამენტო მანდატები. დღეს საქართველოს პარლამენტი სწორედ საქართველოს კონსტიტუციით გარანტირებულ ამ ინსტრუმენტს აამოქმედებს;
დღეს, საქართველოს პარლამენტში უკვე წარმოდგენილია სამი პოლიტიკური პარტია. შესაბამისად, რადიკალური ოპოზიციის მიერ დემოკრატიისთვის ძირის გამოთხრის ყოველგვარი მცდელობა წარუმატებლობისთვის არის განწირული,“ - განაცხადა კობახიძემ.