„ქართული ოცნების“ წევრის, შალვა პაპუაშვილის განცხადებით, მმართველი გუნდის გადაწყვეტილება, ამ ეტაპზე თავი შეიკავოს ოპოზიციონერი დეპუტატებისთვის უფლებამოსილების შეწყვეტისგან, არის პასუხი ოპოზიციის დესტრუქციული ქმედების მიმართ.

როგორც პაპუაშვილმა უმრავლესობის სდომის დასრულების შემდეგ ჟურნალისტებს განუცხადა, ოპოზიციას საკუთარმა ამომრჩევლმა დრო მისცა იმისთვის, რომ მანდატები მიიღოს და თუ ამ დროს არ გამოიყენებს, პასუხს ასევე საკუთარი ამომრჩევლები მოსთხოვენ.

„ვაცხადებდით, რომ „ქართულ ოცნებას“ აქვს მრავალი საშუალება იმისათვის, რომ უპასუხოს ოპოზიციის მხრიდან ამ დესტრუქციულ ქმედებას. ეს რომ დესტრუქციაა, არამხოლოდ ჩვენი შეფასება არის, არამედ, არის ევროსაბჭოს ოფიციალური შეფასებაც, რომ ეს ძირგამომთხრელი საქმიანობაა ჩვენი ოპოზიციის მხრიდან. დღეს მოისმინეთ, რა არის ჩვენი პასუხი ამ ძირგამომთხრელი საქმიანობის წინააღმდეგ. ოპონენტთა რიგებში არის ხალხი, რომელსაც პარლამენტში შესვლა სურს და როგორც ჩანს, გარკვეული მიზეზების გამო თავს იკავებს, ამიტომ ჩვენ გვინდა ყველას მივცეთ შანსი.უპირველეს ყოვლისა, ქართველ ამომრჩეველს, ჩვენი ოპოზიციის ამომრჩეველს გვინდა მივცეთ შანსი, რომ ისინი მანდატის და წარმომადგენლის გარეშე პარლამენტში არ დარჩნენ“, - განაცხადა პაპუაშვილმა.