„ევროპელი სოციალისტების“ ერთ-ერთი ლიდერის დავით ზილფიმიანის განცხადებით, პარტია „ევროპელი სოციალისტები“ ჩაერთვება დროებითი საგამოძიებო კომისიის მუშაობაში, რომელიც 2020 წლის საპარლამენტო არჩევნების შედეგებს შეისწავლის. ამის შესახებ ზილფიმიანმა ჟურნალისტებს პარლამენტში განუცხადა.
„ამ კომისიაში აუცილებლად ჩავერთვებით. გადავწყვეტთ, თუ ვინ ჩაერთვება ჩვენი ჯგუფიდან. იქ, აუცილებლად ვიქნებით წარმოდგენილი და გეტყვით იმ სიმართლეს, რაც ჩემთვის ხელმისაწვდომი იქნება“, - განაცხადა დავით ზილფიმიანმა.
ცნობისთვის, პარლამენტის ვიცე-სპიკერის კახა კუჭავას განცხადებით, „ქართული ოცნება“ გამოდის 2020 წლის არჩევნების შემსწავლელი დროებითი საგამოძიებო კომისიის შექმნის ინიციატივით, „რათა საერთაშორისო საზოგადოების მიერ ლეგიტიმურად ცნობილი, კონკურენტულ და თავისუფალ გარემოში ჩატარებული არჩევნების შედეგები და ყველა შესაბამისი ნიუანსი კიდევ ერთხელ დეტალურად იქნას შესწავლილი უკვე პარლამენტის საგამოძიებო კომისიის მიერ“.