ფრაქცია “ქართული ოცნების“ დეპუტატის გიორგი კახიანის შეფასებით, 31 ოქტომბრის არჩევნებთან დაკავშირებული პარლამენტის საგამოძიებო კომისიაში ჩართვაზე უარის თქმით ოპოზიცია საკუთარი თავის ლუსტრირებას ახდენს.
როგორც კახიანმა ჟურნალისტებს განუცხადა, ნებისმიერ ოპოზიციონერს, ვისაც პარლამენტის წევრის სტატუსი აქვს, საგამოძიებო კომისიის საქმიანობაში ჩართვა შეუძლია.
“გარედან იმაზე საუბარს, რომ არჩევნები გაყალბდა, კეთილი ინებონ, შემობრძანდნენ პარლამენტში და კომისიაში ვიმსჯელოთ. დასვან ნებისმიერი კითხვა, რაც მათ არჩევნების შედეგებთან დაკავშირებით გააჩნიათ, წინააღმდეგ შემთხვევაში, ისინი საკუთარი თავის ლუსტრირებას ახდენენ, რადგან ძალიან კარგად იციან, რომ არჩევნები არ გაყალბებულა. ჩვენ ნებისმიერ საკითხზე მსჯელობისთვის მზად ვართ, მაგრამ მათ საკუთარი პოზიციების სისუსტე ძალიან კარგად იციან. იციან, რომ საკუთარ პოზიციაში მართალი არ არიან, ამიტომ დებატებში შემოსვლას და საერთო მაგიდასთან დაჯდომას თავს არიდებენ“, - განაცხადა გიორგი კახიანმა.