ევროკავშირის ელჩი საქართველოში კარლ ჰარცელი პარლამენტში ევროინტეგრაცის კომიტეტის თავმჯდომარეს მაკა ბოჭორიშვილს შეხვდა. როგორც შეხვედრის დასრულების შემდეგ მაკა ბოჭორიშვილმა ჟურნალისტებთან განაცხადა, საუბარი შეეხო ევროკავშირთან საქართველოს თანამშრომლობას. ბოჭორიშვილის თქმით, კარლ ჰარცელმა გამოხატა სრული მხარდაჭერა ევროკავშირში გაწევრიანების გზაზე საქართველოს გეგმებთან დაკავშირებით.

"დღეს კომიტეტის თავმჯდომარის რანგში მქონდა პირველი შეხვედრა ევროკავშირის ელჩთან. ჩვენ ვისაუბრეთ საქართველო- ევროკავშირის თანამშრომლობის დღის წესრიგზე. ვიცით, რომ საქართველოს ახლო მომავალში აქვს ძალიან ამბიციური გეგმა ევროკავშირში გაწევრიანების გზაზე გადადგას კონკრეტული ნაბიჯები, შესაბამისად, ევროკავშირთან თანამშრომლობას განსაკუთრებულ მნიშვნელობას ვანიჭებთ ჩვენც საპარლამენტო დონეზე. რა თქმა უნდა, მთავრობა თავის მხრივ აქტიურად თანამშრომლობს. ჩვენ პირველ რიგში ვისაუბრეთ ასოცირების იმპლემენტაციაზე, თუ როგორ მიმდინარეობს იგი, ამ პროცესში ევროკავშირის დახმარებაზე. მისი მხრიდან გამოითქვა სრული მხარდაჭერა ევროკავშირში გაწევრიანების გზაზე დაგეგმილ გეგმებთან დაკავშირებით და დავსახეთ სამომავლო გეგმები, თუ როგორ უნდა გავაძლიეროთ საპარლამენტო თანამშრომლობა, რა ნაბიჯები უნდა გადავდგათ,"- განაცხადა ბოჭორიშვილმა.

მისი თქმით, შეხვედრაზე საუბარი შეეხო ოპოზიციასთან მოლაპარაკების საკითხსაც. "შევეხეთ მოკლედ ამ საკითხსაც და ჩვენ ნამდვილად მადლობელი ვართ იმისათვის, რასაც ევროკავშირი და ჩვენი პარტნიორი ქვეყნები აკეთებენ,"- განაცხადა ბოჭორიშვილმა.