"ევროპული საქართველოს" ერთ-ერთი ლიდერის, გიგი წერეთლის განცხადებით, ხელისუფლებამ საოკუპაციო რეჟიმისგან ზაზა გახელაძე მალე უნდა გამოიხსნას. მისივე თქმით, გახელაძის საქმე არის დიდი ჯაჭვი იმ მძიმე ციკლის, როცა საქართველოს მოქალაქეებს აკავებენ, ხოლო ხელისუფლების მხრიდან არანაირი მოქმედება არ არის.
„ძალიან სამწუხაროა, რომ საქართველოს კიდევ ერთი მოქალაქეა საპატიმროში, ძალიან დრამატულად განვითარდა მისი ბედი, რადგან ის ჯერ დაჭრილი იყო, შემდეგ ე.წ. სასამართლომ მიუსაჯა 12 წელი. თუმცა, ეს არის ნაწილი დიდი ჯაჭვის, მძიმე ციკლის, როცა ჩვენ მოქალაქეებს როგორც უნდათ ისე აპატიმრებენ, სასამართლოს ატარებენ როგორც უნდათ და პრაქტიკულად, არანაირი მოქმედება არ არის. ხელისუფლებამ უნდა ეძებოს, ნახოს და აქტიურად მოიძიოს ინსტრუმენტები, ეს სპეცსამსახური იქნება, საერთაშორისო ზეწოლა თუ რაღაც პირდაპირი კავშირები. ყოველ შემთხვევაში, ასეთი მძიმე ბედი, დისკრიმინაცია და მძიმე ყოფა ჩვენი მოქალაქეების საოკუპაციო ხაზზე და მიმდებარე ტერიტორიებზე, რა თქმა უნდა, არის აბსოლუტურად მოუთმენელი,“ - განაცხადა წერეთელმა.
ცნობისთვის, ოკუპირებული ცხინვალის ე.წ. უზენაესმა სასამართლომ საქართველოს მოქალაქეს, კასპის მუნიციპალიტეტის სოფელ ქვემო ჭალაში მცხოვრებ ზაზა გახელაძეს 12 წლით და 6 თვით თავისუფლების აღკვეთა მიუსაჯა.