ანტისაოკუპაციო მოძრაობა “ძალა ერთობაშიას" წევრები რუსეთის ყოფილი საელჩოდან საქართველოს პარლამენტისკენ საპროტესტო მსვლელობას მართავენ.

ისინი ოკუპირებული ცხინვალის ე.წ. უზენაესი სასამართლოს მიერ კასპის მუნიციპალიტეტის სოფელ ქვემო ჭალაში მცხოვრები ზაზა გახელაძისთვის 12 წლით და 6 თვით თავისუფლების აღკვეთას აპროტესტებენ და ხელისუფლებას გახელაძის უკანონო პატიმრობიდან გათავისუფლებისთვის ქმედითი ნაბიჯების გადადგმისკენ მოუწოდებენ.

ანტისაოკუპაციო მოძრაობა “ძალა ერთობაშიას“ ლიდერის, დავით ქაცარავას განცხადებით, ხელისუფლებამ უკანონო პატიმრობაში მყოფი პირები სასწრაფოდ უნდა გამოიხსნას. მისივე თქმით, შემდეგი აქცია შაბათს, ზაზა გახელაძის გატაცების ადგილას იგეგმება.

შეგახსენებთ, რომ ოკუპირებული ცხინვალის ე.წ. უზენაესმა სასამართლომ საქართველოს მოქალაქეს, კასპის მუნიციპალიტეტის სოფელ ქვემო ჭალაში მცხოვრებ ზაზა გახელაძეს 12 წლით და 6 თვით თავისუფლების აღკვეთა მიუსაჯა. გახელაძე დამნაშავედ ცნეს რუსეთის სისხლის სამართლის კოდექსის 317-ე მუხლით (სამართალდამცავი ორგანოს თანამშრომლის სიცოცხლის ხელყოფა) და 322-ე მუხლით (სახელმწიფო საზღვრის უკანონოდ გადაკვეთა).