შინაგან საქმეთა სამინისტროსთან მოძრაობა “სოლიდარობას” წევრებმა აქცია გამართეს. ისინი საჯარო სივრცეში პირბადის გამოყენებასთან დაკავშირებით გამოწერილ ჯარიმებს აპროტესტებდნენ.

მოძრაობა ,,სოლიდარობას” ხელმძღვანელის, ლაშა შუკაკიძის განცხადებით, ადმინისტრაციულ სამართალდარღვევათა კოდექსი საჯარო სივრცეში პირბადის გამოუყენებლობაზე სანქციებს არ ითვალისწინებს, შესაბამისად სამართალდამცავები მოქალაქეების დაჯარიმებისას კანონს არღვევენ.

“ჩვენი დღევანდელი აქცია შეეხება პოლიციის მიერ საჯარო სივრცეში პირბადის გამოყენებასთან დაკავშირებით გამოწერილ ჯარიმებს. პოლიციას არაერთხელ მივმართეთ განცხადებით, რომ კანონი არ ითვალისწინებს საჯარო სივრცეში პირბადის გამოყენებასთან დაკავშირებით საჯარიმო საქციებს. მოვუწოდებ თითოეულ პატრულს ნუ არღვევენ კანონს, მათ არ შეუძლიათ საჯარო სივრცეში დააჯარიმონ მოქალაქეები, ეს არის სისხლის სამართლის დანაშაული და თითოეულ მათგანს მოეკითხება. გვაქვს გაგზავნილი არაერთი საჩივარი, 10 დღის ვადაში პასუხი უნდა გაეცათ, თუმცა იციან, რომ დამნაშავეები არიან და უტიფრად აგრძელებენ დაჯარიმებას”, - აღნიშნა ლაშა შუკაკიძემ.

იხილეთ ვიდეო:შსს-სთან საჯარო სივრცეში პირბადის გამოყენებასთან დაკავშირებით გამოწერილი ჯარიმები გააპროტესტეს