პაატა მანჯგალაძე - თუ ოპოზიცია ხელისუფლებაში მოსვლაზე საუბრობს და ამის პრეტენზია გვაქვს, განსხვავებული აზრის მიმართ შეუმწყნარებლობა და რადიკალიზმი, რაც ხშირად ვლინდება კოლეგების მიმართ, მიუღებელია

პირადად, მიმაჩნია, რომ არასწორია წინა პლანზე ბარიერის საკითხის წამოწევა, როცა რიგგარეშე არჩევნების თარიღზე შეთანხმებული არ ვართ , - ასე შეაფასა "სტრატეგია აღმაშენებელის" ერთ-ერთმა წევრმა, პაატა მანჯგალაძემ „რესპუბლიკური პარტიის“ ერთ-ერთი ლიდერის ხათუნა სამნიძის განცხადება, რომლის თქმით, თუ „ქართული ოცნება“ დაარეგისტრირებს კანონპროექტს, რომელიც პროპორციული არჩევნების ბუნებრივი ბარიერით ჩატარებას უზრუნველყოფს, „რესპუბლიკური პარტია“ კენჭისყრაში მონაწილეობისთვის მზადაა.

როგორც მანჯგალაძემ „პალიტრანიუსის“ გადაცემა „დღის ნიუსრუმში“ განაცხადა, ბარიერის საკითხი მნიშვნელოვანია, მაგრამ ახლა მართებული არ არის ამ საკითხის განხილვა.

„მომწონს ის იდეა, რაც "რესპუბლიკური პარტიის" წარმომადგენელმა გააჟღერა, მაგრამ მოცემულ სიტუაციაში გაუმართლებლად მიმაჩნია. მომწონს იდეა, რომ ბარიერი არ იყოს 5% და შეიძლება 3 % იყოს, რაც საშუალო ევროპული სტანდარტია, ევროპის ბევრ ქვეყანაშია 3%-იანი ბარიერი. ეს სტაბილურობას აზღვევს. ბარიერის საკითხი მნიშვნელოვანია, მაგრამ ახლა მართებულად არ მიმაჩნია, ვიდრე შეთანხმებული არ ვართ რიგგარეშე არჩევნების თარიღზე. თუ ამ საკითხზე დისკუსია გაიხსნება, ჩვენ ჩვენს პოზიციას დავაფიქსირებთ. ინიციატორი ჩვენ არ ვიქნებით, რადგან სწორად არ მიგვაჩნია. არ მომწონს, როდესაც განსხვავებული აზრის მქონე ადამიანზე ხდება რაღაც იარლიყის მიკერება, ეს ძალიან ცუდია. თუ ოპოზიცია ხელისუფლებაში მოსვლაზე საუბრობს და ამის პრეტენზია გვაქვს, განსხვავებული აზრის მიმართ ასეთი შეუმწყნარებლობა და რადიკალიზმი, რაც ხშირად ვლინდება ჩემი კოლეგების მიმართ, ჩემთვის მიუღებელია.

რატომ არ ვეთანხმები იმ იდეას, რომელიც ხათუნა სამნიძემ დააყენა? ჩემთვის არსებითია ეს საკითხი, მაგრამ მოცემულ რეალობაში არ ვეთანხმები. კონსტიტუციის დღევანდელი ჩანაწერის მიხედვით, თუ 2024 წლამდე გაიმართება ვადამდელი ან რიგგარეშე არჩევნები, ჩატარდება არსებული სისტემით, საუბარია 120/30-ზე და ბარიერი იქნება 3%. ჩვენ თუ ერთიანები ვართ და შეთანხმებულები, რომ ვადამდელი არჩევნების მიღწევის გარეშე არ ვაპირებთ პროცესებში მონაწილეობას, 2024 წლისთვის რა ბარიერით იქნება არჩევნები, რატომ გახდა ასეთი აქტუალური?!“,-განაცხადა მან.

პაატა მანჯგალაძის თქმით, „აზრთა სხვადასხვაობა კარგია, რადგან „ჭეშმარიტება კამათში იბადება“.

„პრობლემას ვერ ვხედავ იმაში, რომ ჩვენ განსხვავებული პოზიციები გვაქვს“,-განაცხადა მანჯგალაძემ.

ცნობისთვის, „რესპუბლიკური პარტიის“ ლიდერის ხათუნა სამნიძის განცხადებით, თუ „ქართული ოცნება“ პარლამენტში დაარეგისტრირებს კანონპროექტს, რომელიც არჩევნების პროპორციული წესითა და ბუნებრივი ბარიერით ჩატარებას უზრუნველყოფს, პარტია მზადაა მხოლოდ ამ კანონპროექტის კენჭისყრაში მიიღოს მონაწილეობა. როგორც მან „ინტერპრესნიუსს“ განუცხადა, ამგვარი ქცევა, პარლამენტში შესვლას არ ნიშნავს.

სტეპან გრიგორიანი - რუსეთი ჩქარობს სამხრეთ კავკასიაში დასავლეთთან შედარებით უპირატესობის მიღწევას
მინდია დავითაძე - საამაყოა, როცა WIPO-ს გენერალური დირექტორის მხრიდან დადებითად ფასდება საქპატენტის საქმიანობა
ქართული პრესის მიმოხილვა 05.03.2021
ზურაბ ბატიაშვილი - ხელისუფლებას აქვს მარტივი არჩევანი - ან დასავლეთთან ერთად ან დასავლეთის წინააღმდეგ, ამ არჩევანში თუ დასავლეთის და საკუთარი ხალხის წინააღმდეგ წავლენ, ხელისუფლებას მალევე დაკარგავენ
იურიდიული პირები პროკრედიტ ბანკში ანგარიშებს დისტანციურად გახსნიან
საერთაშორისო სისტემა ინტელიექსპრესი საქართველოს მოქალაქეებისთვის ევროპულ სერვისებზე წვდომას ამარტივებს