ვშიშობ, ერთჯერადად, ორჯერადად ან სამჯერადად, რასაც კანონის ცვლილება მოითხოვს, რომ შევიდეს და ამა თუ იმ ადამიანმა კენჭისყრაში მონაწილეობა მიიღოს, გადღაბნის იმ ცხად სურათს ერთპარტიული პარლამენტისა, რომელიც ივანიშვილმა შექმნა მოპარული არჩევნების შედეგად, - ამის შესახებ „ნაციონალური მოძრაობის“ წევრმა თინა ბოკუჩავამ „პალიტრა ნიუსის“ გადაცემა „360 გრადუსში“ განაცხადა, როდესაც „რესპუბლიკური პარტიის“ ლიდერის ხათუნა სამნიძის ინიციატივაზე ისაუბრა.

მისი თქმით, ისურვებდა, რომ აღნიშნული საკანონმდებლო ინიციატივა ბლოკის შიგნით განეხილათ, სანამ ის საჯარო გახდებოდა.

„ამ საკითხის ასე ამოგლეჯა და მხოლოდ ამ საკითხის გამო პარლამენტში შესვლა ვფიქრობ, უფრო მეტი საფრთხის მატარებელია ვიდრე იმ პოტენციური სიკეთისა, რომელმაც შეიძლება მან ქვეყანას მოუტანოს. ამიტომ, ჩვენთვის, როდესაც სასწორზე დგას ეს საფრთხე და ის შესაძლო სიკეთე, საფრთხე არის უფრო დიდი. ამიტომ, არ ვთვლით, რომ ეს კეთილგონივრული ნაბიჯი იქნება. ჩემი პარტიის პოზიცია იგივეა, რაც გუშინ გაჟღერდა ამ საკითხთან მიმართებით და დღეს ამ პოზიციის შეცვლა ჩემთვის ნამდვილად არ არის ცნობილი. ჩვენ ვთვლით, რომ ნამდვილად არსებობს ისეთი სერიოზული საფრთხეები, რომელსაც თვალი უნდა გავუსწოროთ. დღეს, ბიძინა ივანიშვილის მთავარი გამოწვევა რა არის? არა ჩამოქცეული ეკონომიკა, არა ინფლაცია, არა სამუშაო ადგილები, ყველა სეგმენტი გადარჩენისთვის იბრძვის და ქუჩაში გამოდის, მისი უმთავრესი პრობლემა ახლა არის ერთპარტიული პარლამენტი. იმისთვის, რომ ეს მოცემულობა შეცვალოს ის მზად არის ყველაფრისთვის, ბინძური მეთოდების გამოყენებისთვის, მათ შორის, მაგალითად ტყვეებით ვაჭრობისთვის, ადამიანების თავისუფლებით ვაჭრობისთვის, ამიტომ მისი პრობლემაა ერთპარტიული პარლამენტი და ეს პრობლემა მას არ უნდა შევურბილოთ. ვშიშობ, ერთჯერადად, ორჯერადად ან სამჯერადად, რასაც კანონის ცვლილება მოითხოვს, რომ შევიდეს და ამა თუ იმ ადამიანმა კენჭისყრაში მონაწილეობა მიიღოს, გადღაბნის იმ ცხად სურათს ერთპარტიული პარლამენტისა, რომელიც ივანიშვილმა შექმნა მოპარული არჩევნების შედეგად. ეს არის ის საფრთხე რაზეც ჩვენ ვღელავთ და რაზეც პირადად მე, სერიოზულ საფრთხედ ვაფასებ“, - განაცხადა ბოკუჩავამ.

ცნობისთვის, „რესპუბლიკური პარტიის“ ლიდერის ხათუნა სამნიძის განცხადებით, თუ „ქართული ოცნება“ პარლამენტში დაარეგისტრირებს კანონპროექტს, რომელიც არჩევნების პროპორციული წესითა და ბუნებრივი ბარიერით ჩატარებას უზრუნველყოფს, პარტია მზადაა მხოლოდ ამ კანონპროექტის კენჭისყრაში მიიღოს მონაწილეობა.