ლევან იოსელიანი - ვისურვებდი, რომ ნიკა მელიას გირაო გადაეხადა, არ მემეტება საპატიმროსთვის, თუმცა მისი გადაწყვეტილებაა - ალბათ, აქვს თავისი გეგმა, რაც ამ ყველაფერს უნდა მოჰყვეს

შევეცდებით, “ქართული ოცნებიდან” კოლეგები დავარწმუნო, რომ ნიკა მელიასთვის უფლებამოსილების შეწყვეტა არ არის სწორი იმ საქმეზე, რაზეც უფლებამოსილება ერთხელ უკვე შეუწყდა,- ამის შესახებ “მოქალაქეების” ერთ-ერთმა ლიდერმა, ვიცე-სპიკერმა ლევან იოსელიანმა ჟურნალისტებთან განაცხადა.

მისივე თქმით, მელიას დაკავება არსებულ პოლიტიკურ ვითარებას კიდევ უფრო გაართულებს.

"ნიკა მელიას მიმართ სადეპუტატო უფლებამოსულების შეწყვეტას ჩვენ მხარს არ დავუჭერთ. შევეცდებით, “ქართული ოცნებიდან” კოლეგები დავარწმუნო (რისი იმედიც არ მაქვს), რომ მისთვის უფლებამოსილების შეწყვეტა არ არის სწორი იმ საქმეზე, რაზეც უფლებამოსილება ერთხელ უკვე შეუწყდა და მის მიმართ გამოყენებული იყო გირაო. დარწმუნებული ვარ, კოლეგები გამოჩნდებიან, რომლებიც ამ საკითხს უფრო მეტი პასუხისმგებლობით შეხედავენ და გაიაზრებენ პოლიტიკური კრიზისის კონტექსტში, სადაც პროცესს კიდევ უფრო გაართულებს ნიკა მელიასთვის იმუნიტეტის მოხსნა.

მოლაპარაკებების სივრცეს ასეთი გადაწყვეტილება ძალიან დაავიწროვებს. ვისურვებდი, რომ ნიკა მელიას გირაო გადაეხადა. არ მემეტება, საპატიმროსთვის, თუმცა მისი გადაწყვეტილებაა, მან როგორც პოლიტიკოსმა ეს რისკი აიღო, ალბათ, აქვს თავისი გეგმა, რაც ამ ყველაფერს უნდა მოჰყვეს. პოლიტიკური კრიზისის თვალსაზრისით კარგი არაფერი მოხდება, ეს კიდევ უფრო დაამძიმებს პოლარიზებულ გარემოს, როცა ოპოზიციის დიდი ნაწილი გარეთაა და მოლაპარაკებები ვერ გრძელდება. მოლაპარაკებები რომ გაგრძელდეს, საჭიროა ნდობის აღდგენა, ეს გადაწყვეტილება კი უფრო მეტად დამაბრკოლებელი იქნება, "- განაცხადა იოსელიანმა.

ცნობისათვის, საქართველოს გენერალური პროკურატურა ნიკა მელიას მიმართ პატიმრობის გამოყენების შუამდგომლობასთან დაკავშირებული თანხმობის მისაღებად პარლამენტს მიმართავს.

ალექსანდრე თვალჭრელიძე - ქართულმა პოლიტიკურმა სისტემამ მდგრადობა დაკარგა და გარე ჩარევის გარეშე მისი გამოსწორება შეუძლებელია
ქართული პრესის მიმოხილვა 05.03.2021
სტეპან გრიგორიანი - რუსეთი ჩქარობს სამხრეთ კავკასიაში დასავლეთთან შედარებით უპირატესობის მიღწევას
მინდია დავითაძე - საამაყოა, როცა WIPO-ს გენერალური დირექტორის მხრიდან დადებითად ფასდება საქპატენტის საქმიანობა
საერთაშორისო სისტემა ინტელიექსპრესი საქართველოს მოქალაქეებისთვის ევროპულ სერვისებზე წვდომას ამარტივებს