"გირჩი მეტი თავისუფლებისთვის" ლიდერი ზურაბ ჯაფარიძე აცხადებს, რომ ხელისუფლების წევრები "ნაციონალური მოძრაობის" თავმჯდომარის, ნიკა მელიას დაპატიმრებაზე "ვერ წავლენ".

" მელიასთან მიმართებაში, რაც ხდება ცალსახად პოლიტიკური ამბავია. მანდ კითხვა არის წავა თუ არა ხელისუფლება ერთ-ერთი ოპოზიციური პარტიის თავმჯდომარის დაპატიმრებაზე. მე მაინც მგონია, რომ მაგაზე ვერ წავლენ",-აცხადებს ჯაფარიძე.

პროკურატურა ნიკა მელიას მიმართ პატიმრობის გამოყენების შუამდგომლობასთან დაკავშირებული თანხმობის მისაღებად პარლამენტს მიმართავს.

შეგახსნებთ, 5 თებერვალს, საქართველოს გენერალურმა პროკურატურამ „ერთიანი ნაციონალური მოძრაობის“ თავმჯდომარე ნიკა მელია გააფრთხილა და განმარტა, რომ თუკი ის გირაოს არ გადაიხდის, პროკურატურა სასამართლოს მისთვის აღკვეთის ღონისძიების სახით პატიმრობის შეფარდების შუამდგომლობით მიმართავს. პროკურატურა მელიასთვის აღკვეთის ღონისძიების სახით შეფარდებული გირაოს 40 000 ლარის გადახდას, ან აღნიშნული თანხის ექვივალენტური უძრავი ქონებით გირაოს უზრუნველყოფას ითხოვს. ნიკა მელია 20 ივნისის საქმეზე ჯგუფური ძალადობის ხელმძღვანელობის და მასში მონაწილეობისათვის, საქართველოს სისხლის სამართლის კოდექსის 225-ე მუხლის 1-ელი და მე-2 ნაწილებით, სისხლის სამართლის პასუხისგებაში მიეცა და მას სასამართლომ აღკვეთის ღონისძიების სახით 40 000-ლარიანი გირაო შეუფარდა. ასევე მას აეკრძალა ბრალდების მხარის წინასწარი ინფორმირებისა და თანხმობის გარეშე სახელმწიფო საზღვრის გადაკვეთა.