"გირჩი მეტი თავისუფლების“ ლიდერის ზურაბ ჯაფარიძის მიერ დაუმორჩილებლობის ნიშნად გახსნილ ბარში „ჯაფარასთან“ შრომის ინსპექცია შევიდა. ამ წუთებში ბარში შრომის ინსპექციის წარმომადგენლები იმყოფებიან, რომლებიც კანონით გათვალისწინებულ ღონისძიებებს ახორციელებენ.

„რატომ არიან მოსულები, ჩემთვის გაუგებარია. თუმცა იმის გათვალისწინებით, რასაც ეს დეპარტამენტი ბოლო თვეების განმავლობაში აკეთებს, გასაგებია, რომ მათ დავალებული აქვთ, რომ ყველა ბიზნესი, რომელიც ოპერირებს და არღვევს არაადამიანურ შეზღუდვებს, დასაჯონ. ეს სახელმწიფო სტრუქტურა დაკავებულია იმით, რომ ადამიანებს აკარგვინებს სამსახურს, უხურავს ბიზნესებს“,- განაცხადა ზურაბ ჯაფარიძემ.

ცნობისთვის, "გირჩი მეტი თავისუფლების“ ლიდერმა ზურაბ ჯაფარიძემ დაუმორჩილებლობის ნიშნად ბარი "ჯაფარასთან" გახსნა. როგორც ზურაბ ჯაფარიძე აღნიშნავს, ბარის გახსნა მიმართულია კორონავირუსის პანდემიასთან დაკავშირებული შეზღუდვების გაუქმებისკენ.

ადგილზე იმყოფებიან სამართალდამცავი ორგანოების წარმომადგენლები.