საარჩევნო რეფორმის ფარგლებში, უმრავლესობის მიერ შემუშავებული პროექტით, მოქმედი „საარჩევნო კოდექსიდან“ იმ ჩანაწერის ამოღება ხდება, რომელიც ცესკოს ახალი თავმჯდომარის არჩევის პროცესში, ძველი თავმჯდომარის უფლებამოსილების ვადის გასვლაზე აკეთებს აქცენტს.
უფრო კონკრეტულად, არსებულ საარჩევნო კანონში წერია, რომ ცესკოს თავმჯდომარის უფლებამოსილების ვადის გასვლამდე არა უგვიანეს 30 დღისა, ხოლო უფლებამოსილების შეწყვეტის შემთხვევაში – შეწყვეტიდან არა უგვიანეს 15 დღისა, პრეზიდენტი ცესკოს თავმჯდომარის თანამდებობაზე 3 კანდიდატურას წარადგენს.
უმრავლესობის პროექტით, აღნიშნული ვადები მითითებული აღარ არის და “საარჩევნო კოდექსის“ შესაბამის მუხლში კეთდება ჩანაწერი, რომლის მიხედვით, პრეზიდენტი ცესკოს თავმჯდომარის თანამდებობაზე ცესკოს 3 კანდიდატურას წარუდგენს. ცესკოს თავმჯდომარეობის კანდიდატები კი, ცესკოს წევრობის კანდიდატების შერჩევისთვის დადგენილი წესით შეირჩევიან.
„ქართულმა ოცნებამ“ საარჩევნო ცვლილებების საკუთარი ვარიანტი უკვე მოამზადა და მსჯელობისთვის პარლამენტში შექმნილ სამუშაო ჯგუფს გადასცა.