უენდი მორტონი - საქართველო დიდი ბრიტანეთის უახლოესი პარტნიორი და ძლიერი მოკავშირე ქვეყანაა

საქართველო დიდი ბრიტანეთის უახლოესი პარტნიორი და ძლიერი მოკავშირე ქვეყანაა,- ამის შესახებ ევროპული სამეზობლოსა და ამერიკის საკითხებში გაერთიანებული სამეფოს მინისტრმა უენდი მორტონმა საქართველოს ვიცე-პრემიერთან, საგარეო საქმეთა მინისტრთან დავით ზალკალიანთან გამართული შეხვედრის შემდეგ განაცხადა.

„მოხარული ვარ, რომ დღეს აქ ვიმყოფები და ვხვდები ვიცე-პრემიერს, საგარეო საქმეთა მინისტრს დავით ზალკალიანს, რათა კიდევ ერთხელ დავადასტუროთ ჩვენს ქვეყნებს შორის არსებული მტკიცე ურთიერთობები. ჩვენ გამოვხატავთ განუხრელ მხარდაჭერას საქართველოს სუვერენიტეტისა და ტერიტორიული მთლიანობის, ასევე მთლიანი რეგიონის სტაბულურობისა და სიცოცხლისუნარიანობის მიმართ”,- აღნიშნა მან.

უენდი მორტონმა განსაკუთრებული ყურადღება გაამახვილა გაერთიანებულ სამეფოსა და საქართველოს შორის სტრატეგიული პარტნიორობისა და თანამშრომლობის შეთანხმების მნიშვნელობაზე, რომელიც ძალაში 2021 წლის 1 იანვარს შევიდა.

„აღნიშნული შეთანხმება ორ ქვეყანას შორის ხანგრძლივი ურთიერთობების საფუძველს ქმნის და ხაზს უსვამს საქართველოსთან ჩვენი მტკიცე კავშირების მნიშვნელობას“, - აღნიშნა ევროპული სამეზობლოსა და ამერიკის საკითხებში გაერთიანებული სამეფოს მინისტრმა.

უენდი მორტონის თქმით, მნიშვნელოვანია, რომ ორ ქვეყანას შორის პოლიტიკური და სავაჭრო ურთიერთობები მომავალშიც გაგრძელდეს და გაფართოვდეს. მისი თქმით, საქართველოსა და დიდ ბრიტანეთს შორის არსებობს უამრავი სფერო, სადაც შესაძლებელია კიდევ უფრო მჭიდრო კავშირების დამყარება. უენდი მორტონის განცხადებით, დავით ზალკალიანთან შეხვედრაზე ხაზი ასევე გაესვა პოსტ-პანდემიურ პერიოდში ეკონომიკური ურთიერთობების და ხალხთა შორისი კავშირების კიდევ უფრო მეტად გააქტიურების მნიშვნელობას.

„მე დღეს ვესაუბრე მინისტრ ზალკალიანს იმის შესახებაც, თუ რა შეიძლება ერთობლივად გაკეთდეს მიმდინარე პანდემიასთან გამკლავების მიზნით, ასევე იმის უზრუნველსაყოფად, რომ ჩვენს ქვეყნებში ეკონომიკური აღდგენის პროცესი მტკიცე და მდგრად “მწვანე“ საფუძველს დაემყაროს“,- აღნიშნა უენდი მორტონმა.

საქართველოში ვიზიტის ფარგლებში, უენდი მორტონი შეხვედრებს ასევე გამართავს საქართველოს პრეზიდენტთან სალომე ზურაბიშვილთან, პარლამენტის თავმჯდომარესთან არჩილ თალაკვაძესთან, საქართველოს პრემიერთან გიორგი გახარიასთან, საქართველოს განათლების, მეცნიერების, კულტურისა და სპორტის მინისტრთან, მიხეილ ჩხენკელთან. მინისტრი ასევე ეწვევა საოკუპაციო ხაზთან მდებარე სოფელ ოძისს.

აღნიშნულ ინფორმაციას საქართველოს საგარეო საქმეთა სამინისტრო ავრცელებს.

ალექსანდრე თვალჭრელიძე - ქართულმა პოლიტიკურმა სისტემამ მდგრადობა დაკარგა და გარე ჩარევის გარეშე მისი გამოსწორება შეუძლებელია
ქართული პრესის მიმოხილვა 05.03.2021
სტეპან გრიგორიანი - რუსეთი ჩქარობს სამხრეთ კავკასიაში დასავლეთთან შედარებით უპირატესობის მიღწევას
მინდია დავითაძე - საამაყოა, როცა WIPO-ს გენერალური დირექტორის მხრიდან დადებითად ფასდება საქპატენტის საქმიანობა
სილქნეტი განცხადებას ავრცელებს (R)