ახალქალაქისა და კუმურდოს მიტროპოლიტმა, მეუფე ნიკოლოზმა განმარტა, თუ რატომ მიიღეს სინოდის წევრებმა „გირჩის" მიერ დაფუძნებული ე.წ. რელიგიური ორგანიზაციის წევრებთან დაკავშირებით რიგი გადაწყვეტილებები. როგორც მეუფემ აღნიშნა, ისტორიულად, როცა ადამიანი სხვა ეკლესიის წევრად აცხადებდა თავს, ის მართლმადიდებელი ეკლესიის წევრი არ იყო. მეუფე ნიკოლოზის თქმით, ამ გადაწყვეტილებით მათ ადამიანები გააფრთხილეს.
„ჩვენ „გირჩის" მიმართ არ მიგვიღია გადაწყვეტილება, არამედ მივიღეთ „გირჩის" მიერ დაარსებული რელიგიური ორგანიზაციის მიმართ, რომელსაც ჰქვია ეკლესია, ბევრი სახელია ჩამოთვლილი, მარტო ბიბლიური თავისუფლება არ არის.
ისტორიულად ასე იყო, როდესაც ადამიანი სხვა ეკლესიის წევრად გამოაცხადებდა თავს, ის მართლმადიდებელი ეკლესიის წევრი აღარ იყო. შესაბამისად, ვინც ამ ორგანიზაციაში მიიღო რაიმე საბუთი, რომ ის ამ ეკლესიის წევრი, სასულიერო პირი ან ღვთისმსახურია, ის ადამიანი აღარ არის ჩვენი ეკლესიის წევრი. ჩვენ ეს გავმიჯნეთ და გავაფრთხილეთ ყველა. რა თქმა უნდა, ადამიანი თავის არჩევანში თავისუფალია, რომელი ეკლესიის წევრიც უნდა იყოს, მაგრამ თუ არის იქით, აქეთ არ არის. ვინც ჩემთან ერთად არ აგროვებს, ის აბნევს, ამბობს უფალი და ვინც ჩვენთან ერთად არ არის, ჩვენი მტერია. ასე, რომ ვერანაირ საეკლესიო საიდუმლოებებში მონაწილეობას ვერ მიიღებს ასეთი ორგანიზაციის წევრი. ადრე თუ გვიან ყველანი წავალთ ამ ქვეყნიდან და წესის აგებაც არ შეიძლება",-აღნიშნა მეუფე ნიკოლოზმა.