„საქართველოს მედიატორთა ასოციაციასა“ და გაეროს ბავშვთა ფონდს შორის, ურთიერთთანამშრომლობის მემორანდუმი გაფორმდა.

როგორც „ინტერპრესნიუსს“ „მედიატორთა ასოციაციიდან“ აცნობეს, მემორანდუმის მიზანია, მედიაციის - „დავის გადაწყვეტის ალტერნატიული მექანიზმის“ საქართველოში დანერგვა და პოპულარიზაციის ხელშეწყობა.

„მოგეხსენებათ, რომ ბავშვის მონაწილეობით საოჯახო კატეგორიის სამოქალაქო დავები სავალდებულო სასამართლო მედიაციას დაქვემდებარებულ დავებს განეკუთვნება, შესაბამისად ინსტიტუციები გეგმავენ აქტიურ თანამშრომლობას აღნიშნული მიმართულებით და უსაფრთხო სამედიაციო პროცესის შექმნას ბავშვებისთვის საქართველოში. მხარეების მიერ ასევე იგეგმება ერთობლივი პროექტების, ღონისძიებების, კონფერენციებისა და სხვადასხვა აქტივობების განხორციელება“, - აღნიშნულია გავრცელებულ ინფორმაციაში.

მემორანდუმს ხელი მოაწერეს “საქართველოს მედიატორთა ასოციაციის” თავმჯდომარემ ირაკლი ყანდაშვილმა და გაეროს ბავშვთა ფონდის წარმომადგენელმა საქართველოში ღასან ხალილმა.