დავით ზალკალიანმა მაღალი დონის მინისტერიალზე რუსეთის საოკუპაციო რეჟიმის წარმომადგენლების მიერ საქართველოს ოკუპირებულ ტერიტორიებზე საქართველოს მოქალაქეების უკანონო დაკავებებზე ისაუბრა

15 თებერვალს, საქართველოს ვიცე-პრემიერმა, საგარეო საქმეთა მინისტრმა დავით ზალკალიანმა მონაწილეობა მიიღო მაღალი დონის მინისტერიალში, რომელიც სახელმწიფოთაშორის ურთიერთობებში დაუსაბუთებელი/თვითნებური დაკავების წინააღმდეგ შემუშავებული დეკლარაციის (Declaration Against the Use of Arbitrary Detention in State-to State Relations) მიღებას მიეძღვნა.

როგორც „ინტერპრესნიუსს“ საგარეო საქმეთა სამინისტროდან აცნობეს, ღონისძიება ვიდეო-კონფერენციის რეჟიმში ჩატარდა და მასში მონაწილეობა მიიღო 30-ზე მეტი სახელმწიფოს საგარეო საქმეთა მინისტრმა, მათ შორის კანადის (ორგანიზატორი ქვეყანა), ევროკავშირის წევრი და არაწევრი ქვეყნების საგარეო საქმეთა მინისტრებმა და აშშ-ის სახელმწიფო მდივანმა.

დავით ზალკალიანმა მინისტერიალზე სიტყვით გამოსვლისას ისაუბრა რუსეთის საოკუპაციო რეჟიმის წარმომადგენლების მიერ საქართველოს ოკუპირებულ ტერიტორიებზე საქართველოს მოქალაქეების უკანონო დაკავებებზე, რისი მიზანიც სწორედ საქართველოზე პოლიტიკური ზეწოლის გაძლიერებაა. ამ კონტექსტში ყურადღება გამახვილდა ცხინვალის რეგიონში რუსეთის საოკუპაციო რეჟიმის მიერ საქართველოს მოქალაქის, ზაზა გახელაძის უკანონო ტყვეობის 12 წელზე მეტი ვადით გახანგრძლივების საკითხზე და ხაზი გაესვა საოკუპაციო რეჟიმების მიერ ზაზა გახელაძისა და ყველა სხვა უკანონოდ დაკავებული საქართველოს მოქალაქის დაუყოვნებლივ გათავისუფლების აუცილებლობას.

დავით ზალკალიანმა აღნიშნა, რომ უკანონო დაკავებებზე და საქართველოს ოკუპირებულ ტერიტორიებზე ადამიანის უფლებების უხეშ დარღვევებზე, მათ შორის ეთნიკური ნიშნით, ასევე მიმდინარე ოკუპაციაზე, სრული პასუხისმგებლობა ეკისრება რუსეთის ფედერაციას, როგორც ოკუპირებულ ტერიტორიებზე ეფექტური კონტროლის განმახორციელებელ ძალას, რაც მკაფიოდ დასტურდება ევროპის ადამიანის უფლებების სასამართლოს 21 იანვრის გადაწყვეტილებით. დავით ზალკალიანმა იმედი გამოთქვა, რომ მინისტერიალზე მიღებული დეკლარაცია, უცხო ქვეყნის მთავრობებზე ზეწოლის განხორციელების მიზნით მოქალაქეების უკანონო დაკავებების აღსაკვეთად წინ გადადგმული, ქმედითი ნაბიჯი იქნება აღნიშნული გამოწვევის აღმოფხვრის მიზნით“, - აღნიშნულია ინფორმაციაში.

კახა გოგოლაშვილი - ევროკავშირის მედიაცია გახდა ინსტრუმენტი, რომელიც არ არის ერთჯერადი, სანამ კრიზისი არ მოგვარდება, ევროკავშირი ამ პროცესში ჩართული იქნება
ქართული პრესის მიმოხილვა 01.03.2021
ქართული კონსტიტუციის 100 წლისთავთან დაკავშირებით კავკასიის საერთაშორისო უნივერსიტეტი სამეცნიერო კრებულს ამზადებს
ევროპის გუნდი: ლიბერთი ბანკისთვის უზრუნველყოფილი დამატებითი დახმარებით, COVID-19-ის კრიზისის დასაძლევად  ევროპის საინვესტიციო ბანკის მიერ მიკრო, მცირე და საშუალო საწარმოების მხარდაჭერა ახალ ეტაპზე გადადის
"მაგნიტის" ყოველდღიური 20%-იანი აქცია უფრო მრავალფეროვანი ხდება
სამომხმარებლო სესხი 3-თვიანი სრული საშეღავათო პერიოდით - ტერაბანკის ახალი აქცია
ბაკურიანში საერთაშორისო სათხილამურო ფედერაციის ეგიდით მსოფლიო თასის ეტაპი სკი კროსში დასრულდა