"ერთიანი ნაციონალური მოძრაობის" თავმჯდომარის ნიკა მელიას საქმის პროკურორის მიხეილ სადრაძის განცხადებით, სასამართლოს გადაწყვეტილებას შესაბამისი ორგანო გონივრულ ვადაში შეასრულებს.

როგორც სადრაძემ ჟურნალისტებთან საუბარში განმარტა, ნიკა მელიას არასათანადო ქცევიდან და სხვა გარემოებებიდან გამომდინარე, მის მიმართ პატიმრობის გამოყენება საფუძვლიანი იყო.

"ჩვენი პოზიცია იყო დასაბუთებული და მომდინარეობდა კანონიდან. შესაბამისად, ბრალდებულის არასათანადო ქცევა, სასამართლოსადმი უპატივცემულობა მთელი ამ პროცესისადამი, მისი არაკეთილსინდისიერი დამოკიდებულება სამართლებრივი პერსპექტივიდან, შეგნებულად არგადახდა და სხვა გარემოებები ამ მოთხოვნის დაკმაყოფილების საფუძველს ქმნიდა",- განაცხადა სადრაძემ.

რაც შეეხება გადაწყვეტილების აღსრულებას, სადრაძის განცხადებით, აღსრულებისთვის კონკრეტული დრო განსაზღვრული არაა.

"აღსრულება დაავალა შესაბამის ორგანოს, აქედან გამომდინარე ამ გადაწყვეტილებას შეასრულებს შესაბამისი ორგანო გონივრულ ვადაში. მე ზუსტად ვადას ვერ გეტყვით, თუმცა კანონმდებლობაში ამის კონკრეტული ვადა არ არსებობს. იმედს გამოვთქვამთ, რომ ბრალდებული ამ შემთხვევაში მაინც გამოცხადდება შესაბამის ორგანოში და მოახდენს შესაბამის ქმედებას",- განაცხადა სადრაძემ.