„ნაციონალური მოძრაობის“ ერთ-ერთი ლიდერის, სალომე სამადაშვილის განცხადებით, იმის მიუხედავად, დააკავებენ თუ არა პარტიის თავმჯდომარეს ნიკა მელიას, ქვეყანაში ვადამდელი, თავისუფალი და სამართლიანი არჩევნები მაინც უნდა ჩატარდეს. როგორც მან ჟურნალისტებს განუცხადა, ხალხმა ძალიან დიდი ხნის წინ გააკეთა არჩევანი, რომ იცხოვროს თავისუფალ სახელმწიფოში.

„ჩვენ შევძლებთ იმას, რომ ქვეყანაში აღდგეს დემოკრატიული პროცესი, ეს არის ჩვენი ამოცანა. ჩვენ უნდა მივაღწიოთ ქვეყანაში ვადამდელ, სამართლიან და თავისუფალ არჩევნებს. ხელისუფლება ნიკა მელიას დააპატიმრებს თუ არა, ეს გარდაუვალი იქნება იმიტომ, რომ ჩვენმა ხალხმა ძალიან დიდი ხნის წინ გააკეთა არჩევანი, რომ იცხოვროს თავისუფალ სახელმწიფოში“, - განაცხადა სამადაშვილმა.

მისი თქმით, როგორ იმოქმედებს ოპოზიცია, ეს ხელისუფლების დღევანდელ ქმედებებზეა დამოკიდებული.

„მოდით, ვკონცენტრირდეთ დღევანდელ დღეზე. ხედავთ, რომ აქ მთელი ოპოზიციური სპექტრია შეკრებილი, უამრავი ჩვენი მოქალაქე. ვაპირებთ, რომ ძალიან მშვიდად, მაგრამ ძალიან მტკიცედ ვუთხრათ ხელისუფლებას, არ ვაპირებთ შევეგუოთ ქვეყანაში ავტოკრატიული რეჟიმის გაფორმებას“,-განაცხადა სამადაშვილმა.

ცნობისთვის, 20 ივნისის საქმეზე “ერთიანი ნაციონალური მოძრაობის“ თავმჯდომარეს, ნიკა მელიას აღკვეთის ღონისძიების სახით პატიმრობა შეეფარდა. აღნიშნული გადაწყვეტილება თბილისის საქალაქო სასამართლოს მოსამართლემ, ნინო ჩახნაშვილმა მიიღო. პროცესი 6 საათის განმავლობაში მიმდინარეობდა და მას ბრალდებული, ნიკა მელია არ დასწრებია.