მთავრობისათვის ნდობის გამოცხადების პრობლემა არ დგას - ამაში თქვენ მალე დარწმუნდებით, - ამის შესახებ ჟურნალისტებს "ქართული ოცნების" ერთ-ერთ ლიდერმა, დეპუტატმა სოზარ სუბარმა განუცხადა.

სუბარის თქმით, პარტიის პოლიტსაბჭო პრემიერობის ახალ კანდიდატურაზე იმსჯელებს და ახალი მთავრობის წარდგენა და დამტკიცება დადგენილ ვადებში მოხდება.

მედიასთან საუბრისას სუბარმა დღეს რამდენჯერმე აღნიშნა, რომ პრემიერ-მინისტრის პოსტიდან გადადგომის თაობაზე გახარიას გადაწყვეტილება პირადად მისთვის მოულოდნელი და ძალიან არასასიამოვნო იყო.

„სრულდებოდა ჩვეულებრივი სამართლებრივი პროცედურები, რასაც არაფერი აქვს საერთო პოლიტიკასთან, გარდა იმისა, რომ ვის მიმართაც ეს გადაწყვეტილება სრულდებოდა, არის პოლიტიკოსი. დანაშაული შეიძლება ჩაიდინოს პოლიტიკოსმაც და არაპოლიტიკოსმაც, ხოლო კანონი ყველას მიმართ უნდა იყოს ერთიანი და შეუვალი", - განაცხადა სოზარ სუბარმა.