მოგიწოდებთ და გთხოვთ, მთავრობის ახალი ხელმძღვანელი პარლამენტს, რაც შეიძლება სწრაფად წარუდგინეთ, - ეს განცხადება „ევროპელი სოციალისტების“ წევრმა დავით ზილფიმიანმა პარლამენტის პლენარულ სხდომაზე გააკეთა.
„მინდა ყველამ გავიხსენოთ, რისთვის ვიბრძოდით, ის ტირანია, რაც სააკაშვილის რეჟიმმა მოუტანა ქვეყანას, ერთხმად გადავწყვიტეთ, რომ დამთავრებულიყო. 9 წელია გასული, რა მივიღეთ? ისევ დაპირისპირება, პოლარიზაცია. ჩვენ იმუნიტეტის მოხსნას მხარი არ დავუჭირეთ და იმით ვხელმძღვანელობდით, რომ ქვეყანაში ურთიერთდაპირისპირების ხიფათი გამქრალიყო. არ შეიძლება არ შევხედოთ ამ პოლარიზაციას ვინ ხელმძღვანელობს. ის საქართველოს მოქალაქეც არაა.
მოგიწოდებთ და გთხოვთ, არავითარ შემთხვევაში არ გამოიყენოთ ორკვირიანი ვადა და წარუდგინეთ პარლამენტს მთავრობის ახალი ხელმძღვანელი, რაც შეიძლება სწრაფად“,-განაცხადა დავით ზილფიმიანმა.
შეგახსენებთ, პრემიერ-მინისტრი გიორგი გახარია თანამდებობას ტოვებს. როგორც გახარიამ განმარტა, მას გაუმართლებლად მიაჩნია ნიკა მელიას დაპატიმრება იმ პირობებში, როდესაც არსებობს პოლიტიკური ესკალაციის საფრთხე.