საკრებულოებში მაჟორიტარული ნაწილი აუცილებელია - ადგილობრივი თვითმმართველობა პარლამენტი არ არის, - ამის შესახებ უმრავლესობის დეპუტატმა შალვა პაპუაშვილმა საარჩევნო რეფორმის მიზნით შექმნილი სამუშაო ჯგუფის შეკრებისას განაცხადა.
პაპუაშვილმა ადგილობრივ წარმომადგენლობით ორგანოებში მაჟორიტარული კომპონენტის შენარჩუნების მიზეზები განმარტა.
„ეს არის კომუნალურ საკითხებზე მომუშავე ორგანოები, რომელსაც მნიშვნელოვანი ბმა უნდა ჰქონდეთ ცალკეულ რაიონებთან, თემებთან. მთავარი შეთავაზება არის ის, რომ საკრებულოებში თანაფარდობა იზრდება პროპორციულის სასარგებლოდ. მაგალითად, თბილისში დღეს არის 25/25-ზე მოდელი, შეთავაზებით იქნება 10 მაჟორიტარული და 40 პროპორციული წესით არჩეული. მაჟორიტარული კომპონენტი უნდა დარჩეს", - განაცხადა პაპუაშვილმა.