ფეხბურთელ გიორგი შაქარაშვილის საქმეზე ძალადობის ეპიზოდზე ბრალდებული 3 პირის, საბა ჩხარტიშვილის, საბა გოგშელიძისა და ირაკლი წაქაძის მიმართ დღეს შესაძლოა, სისხლის სამართლებრივი დევნა შეწყდეს. როგორც ჟურნალისტებთან საუბარში ჩხარტიშვილის ადვოკატმა დავით ჭიკაიძემ განმარტა, აღნიშნულის საფუძველი ამნისტიის ახალი აქტია, რომელიც ბრალდებულებს ეხებათ.
დღევანდელ სასამართლო პროცესზე, რომელიც თბილისის საქალაქო სასამართლოში მიმდინარეობს, აღნიშნულ ეპიზოდზე დაზარალებულები - ვახტანგ ჩიქოვანი და ნ. ხ. დააფიქსირებენ საკუთარ პოზიციას.
„ჩემი ინფორმაციით, დღეს პროცესზე შესაძლოა, გამოცხადდნენ ვახტანგ ჩიქოვანი და ნ. ხ. მათი ჩვენების შემდეგ სასამართლო მიიღებს გადაწყვეტილებას საბა ჩხარტიშვილის და დანარჩენი ორი ბრალდებულის მიმართ გაავრცელებს თუ არა 2021 წლის 11 იანვრის ამნისტიის აქტს. მათთვის ბრალად შერაცხულ მუხლებზე ამნისტიის აქტით გათვალისწინებული შეღავათები ვრცელდება და შესაბამისად, დღეს სასამართლო მიიღებს გადაწყვეტილებას", - განაცხადა ჭიკაიძემ.
ცნობისთვის, ფეხბურთელ გიორგი შაქარაშვილის საქმეზე ბრალდებულ 3 პირს - საბა ჩხარტიშვილს, საბა გოგშელიძესა და ირაკლი წაქაძეს აღკვეთის ღონისძიების სახით შეფარდებული პატიმრობა გირაოთი 11 იანვარს შეეცვალა. მათ ძალადობას, ასევე სხეულის განზრახ მსუბუქ დაზიანებას ედავებიან.