მოლაპარაკების მაგიდასთან სწორედაც ჩვენ ვიწვევთ ყველას. რაც ოპონენტებისგან გვესმის, ეს არაა მოლაპარაკების შეთავაზება, ეს ულტიმატუმია, - ამის შესახებ ჟურნალისტებს პარლამენტის პირველმა ვიცე-სპიკერმა გია ვოლსკიმ ოპოზიციის განცხადების კომენტირებისას განაცხადა.

როგორც ვოლსკიმ აღნიშნა, რიგგარეშე ან განმეორებითი არჩევნების ჩატარება სამართლებრივ საფუძველს უნდა ეყრდნობოდეს და არა ოპონენტების შეხედულებებს.

„მოლაპარაკების მაგიდასთან სწორედაც ჩვენ ვიწვევთ ყველას ფასილიტატორი ელჩების მონაწილეობით. ვინაიდან კონკრეტული შეთავაზება გვაქვს, რომ თუ კი აუცილებლობა არსებობს, რომ ჩავატაროთ რიგგარეშე ან განმეორებითი არჩევნები, ეს სამართლებრივ საფუძველს უნდა ეყრდნობოდეს და ეს გადაწყვეტილება არ შეიძლება ემყარებოდეს ნებისმიერი ჩვენი ოპონენტის, გვარებს აღარ ჩამოვთვლი, კოლექტიური სააკაშვილის შეხედულებებს.

რაც ოპონენტებისგან გვესმის, ეს არაა მოლაპარაკების შეთავაზება, ეს ულტიმატუმია, რომ თქვენ წადით, იმიტომ რომ ჩვენ არ მოგვწონს შედეგები, მილიონზე მეტი ადამიანის დამოკიდებულება შექმნილ პოლიტიკურ ვითარებასთან და უნდა მოხდეს ისე, როგორც კოლექტიურ სააკაშვილს სურს, ასე ვერ მოხდება, იმიტომ, რომ ეს სახელმწიფოა და საკმაოდ მძლავრი ინსტიტუტები გააჩნია“, - აღნიშნა ვოლსკიმ.

ცნობისთვის, „ნაციონალური მოძრაობა“ მზადყოფნას გამოთქვამს "ქართულ ოცნებასთან" ვადამდელი არჩევნების შესახებ გამართონ მოლაპარაკებები, ფასილიტატორების ჩართულობით. „ქვეყნის ეროვნული ინტერესია, რომ კრიზისი განიმუხტოს, ამისთვის აუცილებელია შეწყდეს პოლიტიკური დევნა და ჩვენ მზად ვართ, კრიზისის განმუხტვის ერთადერთი სწორი გზის, ვადამდელი არჩევნების შესახებ გავმართოთ მოლაპარაკებები, ფასილიტატორების ჩართულობით“,- ნათქვამია „ნაციონალური მოძრაობის“ განცხადებაში.