სამართალდამცავები თუ „ნაციონალური მოძრაობის” ოფისში შემოიჭრებიან, ვპირდები თითოეულ მათგანს, მათ სახელებს და გვარებს გამოვაკრავთ ყველა ბოძზე, რათა ყველამ იცოდეს, რომ ისინი უდანაშაულო ადამიანების ჩეხვაში იღებენ მონაწილეობას, - ამის შესახებ „ევროპული საქართველოს” ერთ-ერთმა ლიდერმა, გიგი უგულავამ განაცხადა.

უგულავას თქმით, თუ „რომელიმე პოლიციელი ამ კატასტროფაში მონაწილეობას მიიღებს, ის სირცხვილის ბოძზე უნდა იყოს გაკრული”.

„პირობას ვდებ, არც ერთი სამართალდამცველი, რომელიც აღმართავს ხელს და ჩაიდენს უკანონობას და ეს რომ უკანონობაა, მინიმუმ იქიდან ჩანს, რომ პრემიერ-მინისტრი გადადგა და ამის მერე რომელიმე პოლიციელი ამ კატასტროფაში მონაწილეობას რომ მიიღებს, ის სირცხვილის ბოძზე უნდა იყოს გაკრული. მისმა შვილებმა უნდა იცოდნენ, რომ მამა ჰყავს მკვლელი. სხვანაირად ვერ შევცვლით. გვეყოლება ყოველთვის ახალი მთავრობა, რომელიც იმ ნაძირლებს გამოიყენებს, ვინც კანონის სახელით კანონს ფეხქვეშ გათელავს და უდანაშაულო ადამიანებს დაჩეხავს”,- განაცხადა უგულავამ.