„არასდროს დავბრუნდებით საბჭოთა კავშირში"- ამ სლოგანით სამოქალაქო მოძრაობა „სირცხვილია" პარლამენტის უკანა შესასვლელთან აქციას მართავს. მათი განცხადებით, ისინი აპროტესტებენ „ერთპარტიული პარლამენტის მიერ მთავრობის ახალი შემადგენლობის დამტკიცებას და ქვეყნის რუსულ გზაზე სვლას".

„ჩვენ არასდროს არ უნდა დავბრუნდეთ საბჭოთა კავშირში. ეს არის „ქართული ოცნების" პოლიტიკის გამოძახილი, რომელიც მიზანმართულად გვაბრუნებს საბჭოთა კავშირში. ის ფაქტი, რომ დღეს ერთპარტიული პარლამენტი ამტკიცებს მთავრობას ირაკლი ღარიბაშვილის მეთაურობით, მხოლოდ მიუთითებს იმაზე, რომ „ქართულ ოცნებს" არ უნდა საქართველოს ინტეგრაცია ევროატლანტიკურ სტრუქტურებში და პირდაპირ ასრულებენ რუსეთის მითითებებს. ჩვენი მთავარი მიზანია შევახსენოთ „ქართულ ოცნებას", რომ არ დავუშვებთ საქართველოს დაბრუნებას საბჭოთა კავშირში, ვიდრე ცოცხლები ვართ", - განაცხადა აქტივისტმა ნოდარ რუხაძემ.

პარლამენტის უკანა შესასვლელთან სხვა სამოქალაქო მოძრაობის წევრებიც მართავენ აქცია-პერფორმანსს. მათ ადგილზე მიიტანეს ნიახური და განაცხადეს, რომ „როგორც ნიახური, ისე ირაკლი ღარიბაშვილიც მეორედ მოვიდა პრემიერ-მინისტრის პოსტზე".