ჩვენ არ ვართ უშეცდომოები, რა თქმა უნდა, ჩვენი მთავრობა არ არის იდეალური, შეცდომები ყველას მოსდის, მათ შორის, ჩვენ. შეცდომები მოგვივიდა, ალბათ კიდევ მოგვივა, - ამის შესახებ პრემიერ-მინისტრობის კანდიდატმა ირაკლი ღარიბაშვილმა პარლამენტში, რიგგარეშე პლენარულ სხდომაზე სამთავრობო პროგრამის წარდგენისას განაცხადა.

მისივე თქმით, ხელისუფლებამ ყველაფერი უნდა გააკეთოს იმისთვის, რომ მინიმუმამდე დაიყვანოს შეცდომები.

„რაც მთავარია, ეს შეცდომა არ უნდა იყოს მოქალაქეებისთვის სერიოზული პრობლემების შემქმნელი. რატომ ვსაუბრობ ამდენს სტაბილურობაზე, კარგად მოგეხსენებათ, რომ რამდენიმე დღის თუ კვირის წინ ამ დესტრუქციულმა ძალამ სახელმწიფოს გამოცდა გადაწყვიტა, ტესტი მოუწყო. ასე ვთქვათ, ტესტი, რომელიც სამართლამდამცავ სისტემას წარუდგინა არის გათვლილი იმაზე, რომ მოხდეს ჩვენი პოლიციის, მართლმსაჯულების სისტემის დისკრედიტაცია. მოხდეს ჩვენი გმირი საამაყო პოლიციელების დემორალიზება. რაც საბოლოო ჯამში, მთავრობის სრულ დისკრედიტირებას და რეალურად არეულობასა და არასტაბილურობას გამოიწვევს. რა თქმა უნდა, ამას ჩვენ არ დავუშვებდით, არც ახლა და არც მომავალში არ დავუშვებთ. ყველა ასეთ გამოწვევას საკადრის, მტკიცე პასუხს გავცემთ. კარგად გვესმის, რომ ახალგაზრდა დემოკრატია ვართ, ამ 30 წლის განმავლობაში, არაერთი პრობლემა და გამოწვევა გამოვცადეთ“, - განაცხადა ირაკლი ღარიბაშვილმა.