ჩვენი მიზანია, სასამართლო განჩინების აღსრულება, ყოველგვარი იძულებითი ღონისძიების გარეშე, - ამის შესახებ შინაგან საქმეთა სამინისტროს წარმომადგენელმა „ნაციონალური მოძრაობის“ ოფისთან განაცხადა.
მან შეკრებილებს მოუწოდა, ხელი არ შეუშალონ სასამართლო განჩინების აღსრულებაში.
„როგორც ინფორმაცია გვაქვს, ნიკა მელია ამ შენობაში იმყოფება და გვსურს, რომ მოვახდინოთ სასამართლო განჩინების აღსრულება. სასამართლო გადაწყვეტილების აღსრულებისთვის ხელის შეშლა კანონით ისჯება. ხელს გვიშლიან აქ შეკრებილი მოქალაქეები, რომლებიც შესასვლელ კარს არ ათავისუფლებენ. მოვუწოდებთ ყველას, ჩვენი მიზანია, რომ წინააღმდეგობის გაწევის გარეშე, მშვიდ ვითარებაში მოვახდინოთ სასამართლო განჩინების აღსრულება, ყოველგვარი იძულებითი ღონისძიების გარეშე. საშუალება მოგვეცით, ბრალდებულთან მივიდეთ და აღვასრულოთ სასამართლო განჩინება“, - აღნიშნა მან.
ცნობისთვის, "ერთიანი ნაციონალური მოძრაობის" ოფისთან სამართალდამცველები მივიდნენ. პარტიის ოფისში იმყოფებიან პარტიის ლიდერები და მხარდამჭერები. ოფისში იმყოფება ნიკა მელიაც.
პარტიის ოფისში პოლიტიკური პარტიების წარმომადგენლები და მხარდამჭერები მთელი ღამის განმავლობაში იმყოფებოდნენ. მათი განცხადებით, ჰქონდათ ინფორმაციას, რომ მობილიზებულია სპეცდანიშნულების რაზმები, მზადება მიმდინარეობს „ნაციონალური მოძრაობის“ ოფისის შტურმისთვის . მათივე ინფორმაციით, სპეცრაზმს მშვიდობიანად შეხვდებიან.