„ნაციონალური მოძრაობის“ წევრის, ხატია დეკანოიძის განცხადებით, დიპლომატიურ კორპუსთან ოპოზიციის ლიდერების შეხვედრაზე ყველაზე მნიშვნელოვანი საუბარი იქნება იმაზე, თუ სად მიდის ქვეყანა.
ამის შესახებ დეკანოიძემ შეხვედრის დაწყებამდე განაცხადა.
როგორც მან აღნიშნა, ელჩებთან შეხვედრისას ქვეყნის კრიზისიდან გამოყვანის გეგმასაც შეეხება საუბარი.
„ჩვენ გავესაუბრებით ახლა ჩვენს საერთაშორისო პარტნიორებს. მიუხედავად იმისა, რომ მათ აქვთ სრული ინფორმაცია, ძალიან მნიშვნელოვანია მათ შორის მოისმინონ ის ინფორმაცია ჩვენგან, რაც დღეს ხდებოდა „ერთიანი ნაციონალური მოძრაობის“ ოფისში, როგორია ჩვენი ხედვა ზოგადად ქვეყნის პოლიტიკური კრიზისიდან გამოყვანაზე, რა არის აუცილებელი გაკეთდეს იმისთვის, რომ ჩვენი პოლიტიკური კრიზისი განიმუხტოს. მათ შორის, რა თქმა უნდა, საუბარი იქნება „ერთიანი ნაციონალური მოძრაობის“ თავმჯდომარის, ნიკა მელიას დაკავებაზე და ყველაზე უფრო მნიშვნელოვანი საუბარი იქნება იმაზე სად მიდის ქვეყანა“, - განაცხადა დეკანოიძემ.