საქართველოს პარლამენტთან თელავიდან ჩამოსულმა აქტივისტებმა კიდევ ერთი კარავი გაშალეს.

ისინი ,,ნაციონალური მოძრაობის” თავმჯდომარე ნიკა მელიას დაპატიმრებას აპროტესტებენ და მმართველ გუნდს ქვეყანაში შექმნილი ვითარების განსამუხტად ხელახალი არჩევნების ჩატარებისკენ მოუწოდებენ.

აქტივისტები ღამის გათევას და პარლამენტთან დარჩენას აპირებენ. მათი განცხადებით, ზუგდიდიდან და ქუთაისიდან ჩამოსულმა აქტივისტებმა კარავი უკვე გაშალეს. ახლა კი, ბათუმიდან ჩამოსულ აქტივისტებს ელოდებიან.

,,დღეს გადმოვიტანეთ თელავის საპროტესტო კარავი თბილისში და ვუერთდებით ცენტრალურ აქციას. ,,რუსულ ოცნებასთან” ბრძოლა გადავიდა გადამწყვეტ ფაზაში იქიდან გამომდინარე, რომ ბიძინა ივანიშვილი იჭერს ოპოზიციის ლიდერებს ყველანაირი ბრუტალური მეთოდებით. ახლა არის ერთიანობის დრო და ყველას მინდა ვთხოვო ერთი დღე კარავში გამოცადონ საკუთარი თავი დევნილებად.

ჩვენ ვაპირებთ აქ ყოფნას გამარჯვებამდე რომელიც ჩვენთვის იქნება ხელახალი არჩევნების დანიშვნა. ჩვენ არ გვსურს რადიკალური მეთოდები და ვართ მშვიდობიანი პროტესტის მომხრეები. ზუგდიდი და ქუთაისი უკვე აქ არის და ჩემი ინფორმაციით, ბათუმიც მალე შემოგვიერთდება”, - აღნიშნა რამაზ აივაზაშვილმა.