„ევროპული საქართველოს” წევრის, გიგი წერეთლის განცხადებით, დღევანდელი მსვლელობა გამოხატავს „იმ აღშფოთებას, რომელიც აქვს არამარტო ოპოზიციურ სპექტრს, არამედ ძალიან ბევრ ადამიანს საქართველოში”.
მისივე თქმით, დღევანდელ აქციაზე ოპოზიციონერი ლიდერები კიდევ ერთხელ გააჟღერებენ თავიანთ მოთხოვნებს.
„მთავარი ამბავი დღეს არის სწორედ ეს მსვლელობა და მშვიდობიანი მანიფესტაცია, რომელიც გამოხატავს იმ აღშფოთებას, რომელიც აქვს არამარტო ოპოზიციურ სპექტრს, არამედ ძალიან ბევრ ადამიანს საქართველოში ამ შექმნილი ვითარების გამო. რა თქმა უნდა, ეს არის ოპოზიციური ლიდერის, ნიკა მელიას დაპატიმრება, პოლიტიკური ჩიხი, რომელშიც ხელისუფლებამ შეიყვანა მთელი ეს პროცესი, რის გამოც ამ დღეებში საქართველო პრაქტიკულად, მხოლოდ ნეგატიურ კონტექსტში მოიხსენიებოდა მთელ მსოფლიოში, რაც ძალიან ცუდია ქვეყნისთვის.
დღეს გახმოვანდება ის მოთხოვნები, რაც აქვს ოპოზიციას, რაც უკავშირდება პოლიტიკურად მოტივირებული საქმეების შეწყვეტას, ნიკა მელიას და სხვა პოლიტპატიმრების გათავისუფლებას და ახალ არჩევნებს. ხელისუფლება კიდევ ერთხელ ხმამაღლა გაიგებს ადამიანების პროტესტს”,- განაცხადა წერეთელმა.
ცნობისთვის, აქცია პარლამენტთან 15:00 საათზე, დაიწყება, თუმცა იქამდე, 13:00 საათზე ოპოზიციური პარტიების ლიდერები და მათი მხარდამჭერები ფილარმონიიდან საკანონმდებლო ორგანოს მიმართულებით საპროტესტო მსვლელობას სახელწოდებით: „მსვლელობა თავისუფლებისთვის“ მოაწყობენ. 15:00 საათზე პარლამენტთან შეკრებილებს ოპოზიციური პარტიების ლიდერები მიმართავენ.